VOV4.M’nông – Ôi 15/8, Thủ tướng Chính phủ Phạm Minh Chính ƀư tơm rƀŭn nchră sŏng dăng n’gul gâl mpeh trong kan njrăng, n’gang srê Covid-19 đah ăp n’gor, nkual ƀon têh dôl ƀư tĭng tâm nkhah srang kon nuĭh tĭng ntĭm đă 16/CT-TTg n’hanh mbơh ƀư Nghị quyết mrô 86/NQ-CP bah Chính phủ mpeh ăp trong mkra jăch ndăn njrăng n’gang srê Covid-19.

Ta ntŭk rƀŭn

Ntoh ngơi n’glôn jêh rƀŭn nchră, Thủ tướng Phạm Minh Chính lah rjăp, khay bah năp, nău ƀư tĭng Ntĭm đă 16 bah Thủ tướng chính phủ ăp n’gor, nkual ƀon têh geh săk rnglăy uĕh, geh nău n’gluh an. Thủ tướng nkoch kloh, nu nău dôl jêr jŏt, geh ntŭk hô. Nuih n’hâm hôm e “Njrăng n’gang srê kơt njrăng n’gang rlăng”, rgŏ jă lĕ trong chính trị, lam ƀon lan râng njrăng n’gang srê. Thủ tướng lah rjăp, ngan ngăn an chuh dơm vaccine an nuĭh ƀon lan. N’gâng kan dak si lah ngih pah kan mât uănh ngih dak an dơn mpeh nău uănh lah tam, pă an, mât uănh; mô ƀư chuh sŏk prăk, nuĭh chuh sŏk prăk an kỷ luật dâl. Ăp n’gor, nkual ƀon têh dôl ƀư tĭng Ntĭm đă 16 an kơl lor an njrăng n’gang srê, ntŭk đăp mpăn an nkra njêng wăng sa hun hao.

Nuĭh rblang: Y Sưng Phê Ja