VOV4.M’nông: Ƀư tơm n'hanh lah ta rơh tâm nchră pơk sŏng dăng đah Ƀan rđău đă gưl neh dak n'hanh 63 n'gor, nkual ƀon têh mpeh njrăng n'gang nuh srê Covid-19 ƀư kêng măng 7/5 ta nhih pah kan Chính phủ, Thủ tướng Phạm Minh Chính lah rjăp, mô dơi an geh du hê nuĭh uănh lhơ tâm pah kan njrăng n'gang nuh srê ƀư jêng lam nău rêh ŏ r'ah. Lôch ƀoi tĭng n'hanh rblang tơm ntưp rêng, Ƀan rđău đă gưl neh dak năl tơm nuh srê Hà Nam geh tât nuĭh ji 2899, tơm nuh srê Yên Bái, Vĩnh Phúc geh tât rmôt nuĭh rnâng kan Ấn Độ n'hanh Trung Quốc, tơm nuh srê ta Nhih dak si K ntưp rêng bah tơm nuh srê Nhih dak si Bệnh Nhiệt đới Trung ương. Yơn lah tơm nuh srê ta Nhih dak si Bệnh Nhiệt đới Trung ương n'hanh du đêt nuĭh ta Đà Nẵng, Hải Dương mô gĭt kloh tơm ntưp. Nău nê an saơ, tâm lam ƀon lan hŏ geh tơm nuh srê. Bah tơm nuh srê ta Nhih dak si K n'hanh Nhih dak si Bệnh Nhiệt đới Trung ương, Bộ trưởng Bộ Y tế Nguyễn Thanh Long lah rjăp, ăp nhih dak si ân pơk hvi rnoh mât kân ăp nkual geh ma nău ntưp âk kơt khoa but săm ji, cấp cứu, thận nhân tạo. Nuĭh ji n'hanh nuĭh kan dak si ân dơi sŏk mham uănh năl ntưp tĭng rơh gay uănh năl, ơm saơ ăp nuĭh geh ntưp đah nău ji.

Lah ta rnôk tâm nchră, Thủ tướng Phạm Minh Chính đă rgâl di tay nău uănh lhơ, thơ tha tâm njrăng n'gang nuh srê. Thủ tướng lah rjăp đŏng, ăp n'gor rnôk geh nuh srê, mô dơi phit klach, ân nkân nkân, uănh năl di nô nău gay mô ƀư jêng krit nji rlău ir, jêng lơh khuch tât nău đăp mpăn rêh jêng kon nuĭh n'hanh hun hao wăng sa./.

Nuĭh rblang: Điểu Thân