VOV4. M’nông: Thủ tướng Nhật Bản Suga Yoshihide kêng măng 15-4 hŏ bah Tokyo hăn tât Washington gay ƀư rơh hop gưl têh đah Tổng thống Mỹ Joe Biden. Aơ lah hăn khâl lor bôk năp bah Thủ tướng Suga tât Mỹ kơp ntơm bah rnôk păng jêng Thủ tướng Nhật Bản tâm khay 9 năm năm e nơh. Păng lah kruanh rđău kan dak bah dih lor bôk năp ma Tổng thống Joe Biden mâp na nê̆ kơp ntơm bah rnôk hao mât bôk kan tâm khay 1 năm aơ. Ta rơh hop ta Ngih klo tâm nar aơ, Thủ tướng Suga mpŏng mbra ƀư lhăt jăp lơn đŏng nău tâm nsing nơm đah êng 2 hê kruanh rđău kan n'hanh plơ̆ lah rjăp tay băl mpôl tâm rgop Mỹ- Nhật, ơm lah n'gâng tơm bah rnă njrăng neh dak n'hanh tâm boh dak bah dih bah Nhật Bản. Thủ tướng Suga geh trong nchrăp tâm nchră đah Tổng thống Joe Biden trong ƀư tâm rgop gay tĭng ƀư jêng ngăn ngăn nkual Ấn Độ Dương-Thái Bình Dương dah rŏng n'hanh pơk hvi. Bar kruanh rđău kan mbra nchră trong tâm boh rdâng lơh tâm ăp trong kan tơm kơt rnă njrăng neh dak./.

Nuĭh rblang: Điểu Thân