VOV4.Mnông – Chính phủ Nhật Bản an gĭt Thủ tướng Nhật Bản Suga Yoshihide mbra khâl dak Mỹ bah nar 15-18/4 n’hanh mbra geh rơh tâm nchră na nê̆ đah Tổng thống Mỹ Joe Biden tâm nar 16/4. Tâm rơh rƀŭn mbơh Chính Văn phòng chính phủ Nhật Kato Katsunobu an gĭt, aơ lah rơh mâp gưl prêh bôk năp bah wa Joe Biden đah Nhật Bản. Rơh mâp geh nkô̆ nău dŭt khlay tâm nău ƀư tâm ban ŭch bah liên minh Nhật-Mỹ kơt tâm ton bah Mỹ đah nkual Ấn Độ Dương-Thái Bình Dương n’hanh Nhật Bản uănh rơh khâl aơ di nău khlay gay ƀư jru tay tâm boh nsing nơm đah 2 kruanh rđau kan. Nchrăp rơh rƀŭn nchră mbra rgum tâm nchră mpeh ăp nău kơt ntrôl kan ndrel gay nâp nâl tâm rgop Nhật Bản-Mỹ, ndâk njêng nkual Ấn Độ Dương-Thái Bình Dương dah rŏng n’hanh pơk hvi; ăp trong rdâng đah Covid-19, rgâl trôk nar ăp nău dơi kon nuĭh, nău kơl đah Trung Quốc, ăp nău pănh grăp phao ŭnh dăch aơ bah Triều Tiên.

Nuĭh rblang: Y Sưng Phê Ja