Bar nar lôch rnôk ƀon Nhin n’glăp nsum đah thôn Nghĩa Hưng 1 n’hanh Nghĩa Hưng 2 jêng thôn Nghĩa Hưng 2, xã Biển Hồ, nô Siu Ayun, nuĭh nsing nơm bah ƀon, hŏ ndrel kruanh thôn hăn uănh ăp njăr trong ma kônh wa mpŏng ơm dơi tuh bê tông. Lôch n’glăp nsum, âk nuĭh ƀon lan uănh khlay mô dơn lah ntơ săk mhe bah thôn, ma lah ăp ndơ rhŏ dŏng nsum an ƀon lan gĭt nkra ngăch lơn đŏng lah mô. Nô Siu Ayun an gĭt, rnôk mhe tăng lư trong nchrăp n’glăp nsum đah bar thôn lơn lah nuĭh Yuăn, âk nuĭh ƀon lan tâm ƀon tă wĭ wĕ yor nău mha êng mpeh nău way, trong gŭ rêh. Yơn rlău âk rơh tâm dâl nău , nkoch trêng n’hanh rgŏ jă, kônh wa mbrơi mbrơi gĭt lah, nău dăp rgum mô ƀư roh tay săk tơm bah ƀon lan, ma hôm nta trong dơh gay ăp ƀon lan krêp dêh, tâm kơl nsum hun hao.

"Kơt mhe aơ nơh lah mpôl hên geh nău rgop mpeh nkô̆ nău gung trong hăn tâm ƀon đŏng. Kruanh thôn aƀaơ ri nău gĭt blău têh lơn, ngăch prăl lơn, hôm mom ndăm lơn, kuăl điện du tong ri ơh dĭl. Gâp mpŏng lah bah kruanh thôn tât mặt trận mhâm ƀư an ƀon lan, hăn grêt dăch ƀon lan, dêh jôn đah ƀon lan âk lơn ri kơl dơi an ƀon lan."

Mpŏng nuĭh ƀon lan dăch dêh đah n’gâng kan, n’gâng kan ta ntŭk dăch dêh đah nuĭh ƀon lan dôl n’gluh ăp nău ŭch geh mhe đah rmôt cán bộ tâm dâng. Đah nô Đỗ Văn Túc, Kruanh thôn Nghĩa Hưng 2, xã Biển Hồ, lôch 15 năm mbro ƀư kruanh thôn, năm kan mhe dja mpet jâk dŭt âk. Lôch n’glăp nsum, thôn geh rlău 600 rnăk, rlău 2.400 nuĭh. Ntŭk hvi rlău pe tơ̆ rđĭl đah ntơm nơh. Lah hôm mât bôk kan tĭng kơt ơm mbra dŭt jêr ban nău mĭn, nău ŭch rŏng mpŏng geh bah nuĭh ƀon lan. Yor kơt nê̆, lôch dăp rgum ăp tŏng, Chi bộ n’hanh Ban nhân dân thôn hŏ rdâk njêng trong nchrăp na nê̆ an tĭng trong kan, tâm pă ntŭk jêng ăp rkŭm ƀon lan gŭ, tâm pă cán bộ mât uănh tĭng rkŭm. Nchrăp, ăp pơh, Ban nhân dân thôn jŭr na nê̆ tĭng nkual ƀon gŭ hop đah nuĭh ƀon lan, nkre mât ăp rmôt pah kan pơk sŏng dăng bah ngai gay dơn, nkra nău lư an dŭt ngăch.

“Ntŭk hvi, nău ngơi n’hanh văn hoá êng êng. Let năp tay gay dŏng công nghệ mbrô lăp tâm nău rêh nuĭh ƀon lan, ntŭk gŭ nuĭh Yuăn mhâm jêng, nuĭh rnoi mpôl đê̆ mhâm jêng, mhâm ƀư gay rhŏ dŏng nuĭh ƀon lan n’hanh wat jêh nău dơn kan, lah ăp nău gâp wĭ wĕ. Tât rnôk dơn geh n’glêh an ri he sĭt rdâk njêng trong nchrăp dja dĭl. Ntơm nơh he mât ntŭk gŭ huêt jê̆ ri he ƀư êng, geh nău uănh lhơ lơn. Yơn aƀaơ ntŭk gŭ rêh hvi kơt aơ ri ân rdâk njêng ntŭk tât kan, trong nchrăp na nê̆ nkre đah ntŭk kan hvi, rnoh nuĭh ƀon lan âk”.

Ntơm bah 40 thôn, ƀon ntơm nơh, lôch n’glăp nsum, xã Biển Hồ hôm 23 đơn vị, hŭch 42,5%. Ndrel đah nău glêh tam bôk kan, n’gâng kan ta ntŭk dăp rgum rmôt bí thư chi bộ, kruanh thôn tĭng trong rƀŏng tŏng di mpeh nău gĭt blău, nău dơi kan n’hanh nău blău dŏng công nghệ tâm mât bôk kan đŏng.

Ta lam n’gor, tât nar 2/7, Gia Lai hŏ lôch jêh nău dăp rgum ntơm bah 2.693 jŭr hôm 1.400 thôn, ƀon tổ dân phố, hŭch 1.293 bôk kan, tâm ban đah 48,01%.

Wa Nguyễn Thanh Vũ, Groi Giám đốc Sở Nội vụ n’gor Gia Lai an gĭt, hŭch bôk kan lah du rnoh tât bah rnôk dăp rgum dơm. Nău khlay lơn lah n’hao săk tam rmôt cán bộ tâm dâng gay n’gâng kan hôm grêt dăch ta ntŭk đŏng, rhŏ dŏng nuĭh ƀon lan uĕh lơn rnôk ntŭk mât nar lơn ma têh hvi. N’gor dôl dăp rgum tay mpôl kan, nkre ra uănh tay n’hanh rdâk njêng trong nchrăp ntĭm nti, kơi năp nău gĭt blău rmôt bí thư chi bộ, kruanh thôn tĭng trong rƀŏng tŏng an nău ŭch geh mât bôk kan tâm dâng rơh mhe.

"Tĭng Nghị định mbrô 185/2026/NĐ-CP nar 26/5/2026 bah Chính phủ, tâm nê jao nău dơi kan an n’gor ân n’gluh an dŏng quy định mpeh rnoh di, lôch nê geh nkô̆ nău ntĭm nti tĭng trong rƀŏng bah Trung ương. Đah ăp nuĭh dja, ân geh trình độ phổ thông let lơ. Tâl bar đŏng lah nău dŏng công nghệ thông tin. Bí thư chi bộ lah ân dŏng blău sổ tay điện tử, aơ lah du gâl bah nău pah kan rgâl mbrô. Đah rmôt pah kan dja, ăp năm mbra geh ăp trong nchrăp ntĭm nti. Nklăp lôch dăp rgum, n’gor mbra geh trong nchrăp ntĭm nti ơm gay oh nô đăp mpăn n’hanh lăp kan tâm mông nar tâm di lơn."

Lôch n’glăp nsum thôn, ƀon, tổ dân phố, Gia Lai hŏ hŭch bơi du n’gul bôk kan tâm dâng. Yơn nău dơi bah trong nchrăp dja mô dơn weh ma rnoh âk hŭch, ma hôm ta nău rdâk njêng tay rmôt cán bộ tâm dâng tŏng dơi nău gĭt blău, rgâl mhe trong mât bôk kan gay rhŏ dŏng an nuĭh ƀon lan uĕh lơn.