VOV4.M'nông – Ôi nđaơ 1/7, ta ngih pah kan Chính phủ, Thủ tướng Chính phủ Phạm Minh Chính lĕ ƀư tơm rơh rƀŭn Chính phủ ăp rơh khay 6. Ta rơh rƀŭn, Chính phủ djăt n’hanh tâm nchră 6 nău mbơh mpeh ăp nău, rmôt nău: Nu nău wăng sa-rêh jêng khay 6 n’hanh 6 khay bôk năm 2021; Uănh nđôi trong kan ntĭm rđău, ƀĭt joet bah Chính phủ 6 khay bôk năm 2021; Nu nău ƀư tĭng ăp nău kan, trong mkra khlay rgâl ntŭk ntô tăch rgâl, n’hao dơi tâm rlong lam dak 6 khay bôk năp n’hanh nău kan, trong mkra khlay 6 khay dŭt năm 2021;

Ntŭk rƀŭn chính phủ ăp rơh khay 6

Nu nău ƀư tĭng bôk nău kan koh n’hŭch, rgâl dơh nău ntrŭnh geh tât nău ƀư tăch rgâl 6 khay bôk năm n’hanh nău kan, trong mkra 6 khay dŭt năm 2021 n’hanh du đêt nău khlay êng. Ntoh ngơi ta rơh rƀŭn, Thủ tướng Phạm Minh Chính mĭn lah, rơh rƀŭn aơ geh nkô̆ nău khlay, uănh lah nu nău wăng sa-rêh jêng, trong kan ƀĭt joet bah Chính phủ tâm 6 khay bôk năm n’hanh tâm nchră ăp nău kan, trong mkra an 6 khay dŭt năm 2021. Nkre tâm nchră âk nău khlay, jăch ndăn aƀaơ kơt njrăng n’gang srê Covid-19, dôh rklaih jêr jŏt ntrôl nkra njêng, tăch rgâl.

Nuĭh rblang: Y Sưng Phê Ja