VOV4.M’nông: Kêng măng nar 22/6/2021, Thủ tướng Chính phủ Phạm Minh Chính hŏ kuăl điện tâm nchră đah Thủ tướng Đức Angela Merkel. Ta rnôk kuăl điện tâm nchră, bar Thủ tướng mpơl nău rhơn mpeh ăp nău dơi tâm boh jru hvi đah bar dak tâm rlău 45 năm aơ kơp ntơm bah njêng tâm boh. Thủ tướng Phạm Minh Chính lah rjăp, Việt Nam way uănh khlay tâm boh têh dơi jŏ jong đah Đức, ŭch rŏng ƀư jru hvi tay lơn tâm boh dêh bên n'hanh nsing nơm đah bar dak kalơ âk trong kan.

Thủ tướng Angela Merkel mĭn lah Việt Nam lah dak tâm boh khlay tâm trong rƀŏng tât nkual bah Đức, uănh khlay tâm boh Việt Nam - Đức n'hanh lah rjăp bar dak dôl dâk ta năp âk trong dơh tât n'hanh mpŏng hun hao têh, ân dơi n'hao uĕh dăng tay. Gay ndrel rdâk n'hao n'hanh n'hao dăng tâm boh âk ntil uĕh lăng đah bar dak, bar ding tâm ban ŭch ơm nthoi tay tâm khâl nsum, tâm mâp gưl têh n'hanh rdâk tay ăp nău way tâm boh, tâm nê uănh khlay n'hao nău dơi tam Ủy ban tâm rgop mpeh tâm boh wăng sa Việt Nam - Đức.

Nuĭh rblang: Điểu Thân