VOV4.M’nông: Tơm prăk rvăt vắc xin njrăng Covid-19 hŏ ntơm luh đah nkô̆ rgum n’hâm rgop bah ƀon lan đah Chính phỷ ân geh vắc xin ơm ngăn. Ntoh nau ta nar ntoh măt Thủ tướng Phạm Minh Chính lah kloh “Aơ lah tơm prăk kơl an bah nuih n’hâm tâm rnglăp, bah nau rnơm, bah play nuih tâm nthoi ma play nuih gay nơm rlet rlau nau jêr, rgop nau njêng du neh dak Việt Nam geh dơi”.

Tĭng nau rgum gay rvăt ndrel chuh ân 75 rkeh nŭih, Việt Nam ŭch geh 150 rkeh dŏng vắc xin, đah rlau 25 rmen. Ndrĭ, gay geh tŏng prăk rvăt vắc xin ân ƀon kan tĭng nau nchrăp, nau kan ndâk tơm prăk rgop rvăt văc xin njrăng Covid-19 gay kuăl jă ƀon lan, tahen lam dak, nŭih ƀon lan nơm tâm dak ba dih, ăp ntŭk kan tăch rgâl, ăp rmôt, nŭih nơm râng nau rgop, kơl an ân tơm prăk rvăt vắc xin Covid-19 đah nuih n’hâm bah ăp nŭih, bah ƀon lan, bah neh dak, rnoi mpôl ndrel nuih n’hâm tâm rnglăp lam ntur neh, nsum ty ntrŭt jăng lơi srê./.

Nŭih rblang: H’Thi