VOV4.M’nông: Kêng măng 15/7 ta Nhih pah kan Trung ương Đảng, Tổng Bí thư Nguyễn Phú Trọng hŏ geh rơh kuăl điện tâm nchră đah Tổng thống Hàn Quốc Mun Chê In. Tổng thống Hàn Quốc Mun Chê In lah rjăp uănh khlay tâm boh đah Việt Nam; lah rjăp Việt Nam lah dak băl tâm boh khlay tâm trong rƀŏng kan mpeh bah dâng mhe n'hao dăng bah Hàn Quốc; an gĭt, Hàn Quốc mbra ntop kơl tay n'hanh tâm boh lhăt đah Việt Nam tâm njrăng n'gang nuh srê Covid-19; ŭch rŏng n'hao dăng lơn đŏng tâm boh đah bar dak kalơ ăp trong kan wăng sa, tâm boh dak bah dih, rnă njrăng, njrăng n'gang neh dak… gay ơm ndơ̆ tăch rgâl bar ding ơm tât 100 rmen đôlar, n'hao tâm boh Hàn Quốc - Việt Nam hun hao prêh mhe rƀŏng tât nkah ndray 30 năm njêng tâm boh bar dak tâm năm 2022.

Bar kruanh rđău kan tâm ban ŭch pơk hvi tay tâm boh ngăn ngăn kalơ ăp trong kan, ntrôl dăng tâm boh tâm njrăng n'gang nuh srê n'hanh pă an vaccine njrăng n'gang Covid-19, ƀư jru hvi lơn tâm boh đảng tơm, Quốc hội n'hanh đah rơh kơn mom ndăm bar dak, njêng jâng nsing nâp an tâm boh bar dak n'hanh  ƀon lan bar dak Việt Nam - Hàn Quốc hun hao tay dăng ./.

Nuĭh rblang: Điểu Thân