VOV4.M’nông – Tổng Bí thư Nguyễn Phú Trọng lĕ kuăl jă juăl tât ƀon lan, đồng chí, tahen lam dak n’hanh ƀon lan ta dak bah dih mpeh trong kan njrăng, n’gang srê Covid-19. Tâm sam ƀŭt, Tổng Bí thư lah rjăp: “Aƀaơ, nu nău srê Covid-19 hôm dŭt jêr jŏt, ntưp dŭt ngăch, ƀư khuch hoach têh đah săk soan n’hanh nău rêh bah nuĭh ƀon lan, khuch hô tât wăng sa-rêh jêng n’hanh ăp ntil bah nău rêh. Đah nuih n’hâm “Njrăng, n’gang srê kơt njrăng n’gang rlăng”, mât uănh săk soan, nău rêh bah nuĭh ƀon lan lah bôk năp lor, ndơn măt kruanh Đảng n’hah Ngih dak, gâp ngăn ngên kuăl jă lam Đảng, lam ƀon lan, lam tahen n’hanh ƀon lan gŭ dak bah dih: He lĕ nsrôih lơ nsrôih tay; lĕ tâm rnglăp lơ tâm rnglăp tay; lĕ  nsrôih têh nsrôih têh tay; lam rnoi mpôl âk nuĭh kơt ngoay, du nuih n’hâm ndrel Đảng, Chính phủ, ăp gưl, ăp nău kan joi trong nking n’gang, ntrôl rŭch an dơi, mô an srê ntưp rêng, ntoh tâm ntŭk gŭ rêh. Gâp đă ăp gưl ủy, rmôt kan đảng, n’gâng kan ƀon lan, ntĭm rđău njrăng, n’gang srê Covid-19 bah Trung ương tât bah dâng an nsrôih lơn tay tâm nău ntĭm rđău, ƀĭt joet; rgum âk n’hâm soan, mông nar, kơl lor ăp nŭh kan, nchrăp rdâng đah nu nău mhe bah srê; ngăch, mĭn ƀư mhe geh tâm nău kan khlay aơ.

Gâp nsing nơm jru, lam dak rgop soan, lam Đảng, lam ƀon lan ndrel nuih n’hâm tâm ban ŭch nău mĭn n’hanh ƀư, ndrel đah nău kơl bah ƀon lan he ta dak bah dih n’hanh băl mpôl lam ntŭr neh, he mbra dơi lơh dăng chôt srê Covid-19 n’hanh an dăng đah ăp nău dơi, rgop tâm di nău nsrôih nsum bah lam kon nuĭh yor du ntŭr neh đăp mpăn, uĕh lăng, tâm rnglăp, dăch deh, kan ndrel n’hanh, tâm di đah nău way ơm janh dăng ntơr ang bah Neh dak he, Rnoi mpôl he !.”

Nuĭh rblang: Y Sưng Phê Ja