VOV4.Mnông –  Nkhêp di Đại hội lam dak rơh tal 13 bah Đảng Cộng sản Cu-ba dơi ƀư lôch uĕh, Tổng Bí thư Nguyễn Phú Trọng lĕ geh kuăl điện tâm nchră đah đồng chí Miguel Diaz-Canel Bermudez, Bí thư bôk năp Ban Chấp hành Trung ương Đảng Cộng sản Cu-ba, Kruanh dak Cộng Hòa Cu-ba. Tổng Bí thư Nguyễn Phú Trọng mbah rhơn Đảng Cộng sản Cu-ba lĕ ƀư lôch uĕh Đại hội lam dak rơh tal 13; mbah rhơn đồng chí Mi-ghen Đi-át Ca-nên dơi Trung ương Đảng Cộng sản Cu-ba nsing nơm săch ƀư Bí thư bôk năp; nkoch nău nsing nơm Đảng Cộng sản Cu-ba mbra ntĭm rđau nuĭh ƀon lan Cu-ba oh nô rlet rlău ăp jêr jŏt, ntul rlong, ƀư tĭng lôch uĕh ăp nău rƀŏng, trong hăn yor Đại hội 13 n’gluh an, ndâk njêng neh dak Cu-ba xã hội chủ nghĩa uĕh lăng n’hanh nâp nâl. Tổng Bí thư Nguyễn Phú Trọng lah rjăp, Việt Nam uănh khlay n’hanh mpŏng ŭch ƀư jru tay nău tâm boh dăch dêh đah 2 đảng, 2 ngih dak Việt Nam-Cu-ba; dăn đă năm tât, 2 ding ân tâm rgop rjăp gay ƀư săk rnglăy ăp tâm ton gưl prêh ăp ding, ndơ̆ tâm boh Việt Nam-Cu-ba hăn jru, ngăn ngên n’hanh nâp nâl.

Nuĭh rblang: Y Sưng Phê Ja