VOV4.M’nông: Ôi 5/5, ta Hà Nội, ƀư Lễ Nkah ndray 70 năm njêng n'gâng kan Ngân hàng Ngih dak Việt Nam (06/05/1951 - 06/05/2021) n'hanh wơt dơn Huân chương Lao động hạng Nhất. Tổng Bí thư Nguyễn Phú Trọng tât râng n'hanh geh nău lah. Păng nkah tay nău way ơm rdâk njêng n'hanh têh jêng bah n'gâng kan Ngân hàng, Thống đốc Ngân hàng Ngih dak Việt Nam Nguyễn Thị Hồng lah rjăp: uănh tay du njăr trong 70 năm rlău aơ, n'gâng kan Ngân hàng way n'hao êng săk mpeh ăp nău dơi, nău rgop bah n'gâng kan đah nău rdâk njêng, hun hao n'hanh mât njrăng neh dak. Rnê ăp nău dơi n'gâng kan Ngân hàng hŏ tă geh, Tổng Bí thư Nguyễn Phú Trọng lah rjăp: Gay tĭng ƀư dơi ăp rnoh tât hun hao neh dak, n'gâng kan Ngân hàng đah nău ƀư "sre suan mham bah jâng wăng sa" ân ntrôl dăng tay lam lĕ rngôch, nsrôih lơn đŏng, mât an dŭt uĕh ăp nău dơi hŏ geh n'hanh nău tă ơm gĭt kan geh nău dơi; ƀư răp jăp, lĕ n'hâm suan ƀư bah ăp ntŭk khoah, rbăn lhơ gay rƀah năn ngăch, ndơ̆ neh dak hun hao ngăch n'hanh nâp dăng lơn đŏng tâm rơh mhe./.

Nuĭh rblang: Điểu Thân