VOV4.M’nông - Tĭng nău mbơh bah chính phủ Mỹ, Tổng thống Mỹ Joe Biden n’hanh Tổng thư ký Liên hợp quốc Antonio Guterres lĕ geh rơh tâm nchră ta măng nar 20/9 (tĭng mông dak Mỹ), tâm nchră mpeh rơh nchăng n’gang tay srê Covid-19, ăp trong njrăng n’gang rgâl trôk nar duh nđik, kơt nsrôih nsum gay nking n’gang nău tâm lơh lam ntŭr neh. Nău mbơh bah Mỹ nkoch kloh, 2 ding mĭn lah tay nău tâm boh kan ndrel têh dăng đah Mỹ n’hanh Liên hợp quốc, lơn lah, nsing tâm ăp nău khlay nsum geh tâm ryơk nău  dơi kon nuĭh, ăp nău dơi dah rŏng bôk năp kơt luật pháp lam ntŭr neh. Na nê̆, 2 ding lah rjăp tât nău khlay bah nău n’hao kan ndrel, tâm rgop ndrel ăp dak kan ndrel bah Liên hợp quốc rƀŏng tât ơm lôch chôt srê Covid-19, nchrăp rdâng bah năp ăp nău ntêt nkri mpeh rnă njrăng dak si tâm rgŏ năp; nchăng n’gang tay rgâl trôk nar duh nđik; nking n’gang n’hanh n’hŭch tâm lơh kơt ntrôl n’hanh mât njrăng nău dơi kon nuĭh ta lam ntŭr neh.

Nuĭh rblang: Y Sưng Phê Ja