VOV4.M'nông: Ôi 29/10, ta Hà Nội, Bộ Kế hoạch n'hanh Đầu tư hŏ ƀư "Tâm nchră an ƀư bôk nău kan têh jong gưl neh dak mpeh hun hao kloh rsang lvang năm 2021- 2030, uănh ngai tât năm 2050". Râng tâm nchră geh ntơh măt ăp Bộ, ăp n'gâng kan, ăp n'gor, ntơh măt du đêt Đại sứ quán, ăp mpôl kan dak bah dih, đah pah kan hun hao, ntơh măt ăp doanh nghiệp, nuĭh rnâng kan gŭ mĭn. Trong kan hun hao kloh uĕh ndơ̆ puăn rnoh tât kan khlay lah: Hŭch bah krŭl duh jay bil, kloh srang ăp n'gâng kan wăng sa; kloh uĕh gŭ rêh n'hanh ntrŭt ntrôl dŏng ndơ nâp dăng n'hanh kloh uĕh tâm rnôk ndơ̆ rgâl. Lơn lah, nău ŭch bôk năp lah n'hŭch rnoh krŭl duh jay bil ta GDP, rgop tĭng ƀư rnoh tât kan ndrop nkre mât njrăng ntŭk gŭ rêh, nkre tâm rgop lhăt đah hun hao "ngăch, nâp dăng". Trong kan ndơ̆ luh tât năm 2030, rnoh krŭl duh jay bil ta GDP hŭch dŭt đêt 15% rđĭl đah năm 2014. Ngai lơn, năm 2050, rnoh âk krŭl duh jay bil ta GDP hŭch dŭt đêt 30% rđĭl đah năm 2014.

Nuĭh rblang: Điểu Thân