VOV4.M’nông: Ta rnôk tâm nchră pơk sŏng dăng ăp kruanh kan gưl têh (SOM) ASEAN+3 đah ASEAN n'hanh ăp dak băl tâm boh Trung Quốc, Nhật Bản n'hanh Hàn Quốc mhe ƀư, Trung Quốc, Nhật Bản n'hanh Hàn Quốc lah rjăp da dê mbra ŭch tĭng tay uĕh ăp nău mĭn mhe bah ASEAN mpeh njrăng n'gang nuh srê Covid-19. Ta rnôk tâm nchră, ăp dak rhơn rnê ăp nău rgâl uĕh tâm boh ASEAN+3, mât uĕh suan dăng ơm geh tâm rơh rdâng lơh geh nău tam đah ăp nău tât duh jêr tâm rlău bar rach năm aơ, tâm boh kan nsum năn ngăch n'hanh geh nău tam rdâng lơh đah Covid-19. Trung Quốc, Nhật Bản n'hanh Hàn Quốc ton ntop kơl tay ăp dak ASEAN n'hao nău dơi kan dak si rnă njrăng  lor, gŭ mĭn, hun hao n'hanh dơi tât dŏng đah vaccine njrăng n'gang Covid-19 đăp mpăn, geh nău tam, n'hanh tâm ban./.

Nuĭh rblang: Điểu Thân