8.000 rnăk tăm cà phê đah rnoh neh huêt jê̆ ta  nkual jêr jŏt bah n’gor Dak Lak mbra dơi ntop kơl tĭng ƀư mât chăm cà phê bên di đah rgâl duh nđik trôk nar lvang năm  2023-2028. Aơ lah nău lư dơi n’gluh ta rơh hop an ƀư trong nchrăp kan “Mât chăm cà phê bên di đah rgâl duh nđik trôk nar ta Việt Nam” tă bah Sở Nông nghiệp n’hanh Phát triển nông thôn n’gor Dak Lak kan nsum đah mpôl kan hun hao Hà Lan SNV ƀư tâm kêng măng 6-3.

Trong nchrăp ntop kơl an n’gor Dak Lak rnoh khlay rlău 18 rmen prăk. Ƀư ntơm bah khay 1/2024 – khay 10/2028, ta ăp nkual tăm cà phê jêr jŏt bah n’gor. Nău ŭch bah trong nchrăp kan lah rgâl geh nău rêh an 8.000 rnăk ƀon lan ta nkual  tăm cà phê jêr jŏt mpeh dak tŏ n’hanh mô hŏ râng tâm bôk nău kan tăm cà phê kơp dơn ma trong kơi năp nti mpeh mât chăm; bah nê, n’hao nău gĭt êng dŏng tâm di tơm dak mpêt khlay, âk ntil ndơ gŭ rêh, hŭch bah krêp  khan dak si ndrŭng tâm ndơ tuch tăm, mât njrăng n’hâm suan an nuĭh kan; n’hao nău dơi tam mât dŏng prăk kaih tâm rnăk wâl ta nău mĭn n’gluh n’huk  djơh  jŏ jong n’hanh bên di đah rgâl duh nđik trôk nar./.