Bơi jât năm aơ, âk rnăk ƀon lan kan lŏ mir ta thị xã Buôn Hồ (Dak Lak) hŏ nănh ndjôt tơm đào tăm tăch Tết. Tă bah tơm tâm di đah neh ntu jêng kao đào way luh dang kao n’hanh dơi nuĭh ƀon lan dŭt ŭch. Nău kan tăm kao đào hŏ an âk rnăk ƀon lan nsĭt geh wăng sa uĕh. Aƀaơ nuĭh tăm ntil tơm dja dôl mô gŭ rlu nchrăp mât chăm n’glĕ dŭt gay nchrăp an khay kao Tết Giáp thìn 2024.

Nô Phạm Đức Dậu ta phường Đoàn Kết lah nuĭh leo lor ndơ̆ tơm Đào Nhật Tân bah nkual ƀon têh Hà Nội lăp Buồn Hồ, Dak  Lak rlong tăm bơi 10 năm bah năp nơh. năm aơ, rnăk nô geh 800 tơm đào, nchrăp tăch bah 400 – 600 rbăn prăk/tơm. Tĭng nô Dậu, tăm đào mô jêr, yơn ân ndê na nê̆. Gay tơm luh dang kao di rnôk Tết ri ân ntrŏng leng na nê̆, mât rnoh l’ĭt mbĕ đăp mpăn, poh phân di rnoh âk n’hanh njrăng n’gang tu ndrŭng chuh sa tơm lha:

“Neh guh Tây Nguyên ri pru, mô chăt ntang jêng tâm di đah tăm đào bắc, tơm way hao jêng uĕh. Djăt ma he ân mât mhâm ƀư gay poh phân, puh dak si mât njrăng si tăm; njrăng der tu ndrŭng chuh sa di rnôk ri tơm mbra luh kao uĕh, tâm ban. Trôk nar dja ri hao hao jêng uĕh, tâm ban, nuĭh tăm kao mbra nsĭt geh wăng sa uĕh Tết răm mƀak ndrel rnăk wâl.”

Lah nuĭh ƀon tơm ta n’gor Hà Tây ơm n’hanh lăp gŭ ta nkuâl Krông Pắk wăng sa rlău 10 năm bah năp nơh, nô Nguyễn Văn Tâm an gĭt ăp năm rvăt đào sĭt pâl Tết da dê. Đào tăm ta aơ uĕh jêng tâm ban kơt ăp tơm đào Miền Bắc, đah kao dang ndrop, kao bi, n’ging mpŭm uĕh, yơn hôm geh rnoh khlay tâm di đŏng:

“Rnoh khlay kao đào ta thị xã Buôn Hồ dŭt tâm di, thuk n’hanh dŭt uĕh. Kao way   dang di tâm rnôk Tết gay kônh wa pâl Tết jêng gâp rvăt. Rđĭl đah đào ta ăp n’gor mpeh Bắc, ri đào aơ uĕh tâm ban kơt ta nê đŏng mô châp ôh”.

 Aƀaơ, ta thị xã Buôn Hồ geh 36 rnăk tăm kao đào n’hanh hŏ tâm  rgop jêng hợp tác xã, đah lĕ rngôch rnoh hvi rlău 17 ha. Ăp nuĭh tơm mir năm aơ nchrăp n’gluh tăch nklăp 18.000 – 20.000 tơm kơt: Đào Nhật Tân, Đào Bích, Đào Phai n’hanh Đào Tuyết. Tĭng wa Nguyễn Văn Thắng - Giám đốc HTX Thương mại n’hanh Dịch vụ Hoa đào Đoàn Kết, ndơ tăm “Tơm kao đào Buôn Hồ” aƀaơ hŏ dơi tâm pă ntil OCOP 3 sao n’hanh dôl nsrôih hao 4 sao gay rƀŏng tât tăch n’gluh:

“Hợp tác xã hŏ tĭng ƀư nău ký ton jă ăp nuĭh blău ti tăm dâk bôk lăp lăp ta aơ kơl ăp rnăk xã viên mât chăm ƀư uĕh ăp tơm đào ơm yău ƀư tŏng di rnoh uĕh gay tăch n’gluh dak bah dih, n’hanh nkoch n’hơ ta ntŭk tăch rgâl lam ntŭr neh. Hợp tác xã mbra ndơ̆ rgâl công nghệ, ntil an kônh wa ta ăp n’gor êng n’hanh n’gor Dak Lak, bol moh nuĭh ŭch geh ân dơi ntop kơl n’hao nsĭt geh wăng sa đŏng.”

Tâm rơh rgŏ jă tăm si "Mbro mbrăng nkah gĭt wa Hồ" năm 2023 thị xã Buôn Hồ (Dak Lak) hŏ tăm 400 tăm tơm đào gay ƀư uĕh nkual ƀon têh. Lôch geh ngăn ta ntŭk an saơ, ta aơ  uĕh di mpeh neh ntu n’hanh dŭt tâm di đah tăm tơm kao đào. Ndơ an saơ lah hŏ geh dŭt âk rnăk ta thị xã Buôn Hồ tăm n’hanh tĭng kơn ƀư geh ndrŏng nơm  geh tăm tơm đào tâm rnôk Tết, năm mhe tât.

Wa Đặng Gia Duẩn – Kruanh UBND thị xã Buôn Hồ an gĭt, lôch ngăn geh ta ntŭk an saơ, ta aơ geh uĕh mpeh neh ntu, trôk nar n’hanh dŭt tâm  di đah tơm kao đào. Ndơ an saơ lah hŏ geh âk rnăk ta thị xã Buôn Hồ tăm n’hanh tĭng kơn ƀư  geh ndrŏng nơm geh tăch kao đào tâm rnôk Tết, năm mhe tât. Jêng, nău rgŏ jă tăm bơi 400 tơm kao đào mbra lah du jâng ntơm mhe, nkah pơk an du trong rƀŏng mhe an  trong rêh bah nuĭh ƀon lan. Buôn Hồ mbra geh du “Trong kao đào”, du ntŭk check-in khay năm mhe ton âk nău uĕh. Rnôk nê, kônh wa mbra geh suan ntrôl, trong pơk hvi neh tăm. Aơ lah jâng nsing ntơm an nău rdâk njêng kao đào Buôn Hồ jêng ndơ  geh ƀư OCOP n’hanh geh săk ntơ lư êng, rgop kơl thị xã geh tât dŭt đêt 10 ntil ndơ geh ƀư OCOP tâm năm 2025.

Tâm let năp tay, rnôk tŏng geh nău dơi, thị xã Buôn Hồ mbra ƀư “Nar rgum pâl kao đào”, hăn tât “Lễ hội kao đào Buôn Hồ” gay wăch rgum ăp tơm ndơ ntuh kơl n’hanh hun hao pâl nđaih an thị xã tâm let năp tay. Nău khlay lơn đŏng, nău hun hao tơm kao đào mbra njêng rup uĕh ntĭt êng bah du nkual neh uĕh reh, rsang rnglăy, nuih n’hâm tâm rŏng./.