Lôch rnôk ƀon pâl nđaih Trà Nhiêu ta nkuâl Duy Xuyên, n’gor Quảng Nam njêng, nuĭh ƀon lan ta ntŭk hun hao tay ntil pâl nđaih dja nsĭt tay tơm geh wăng sa âk. N’gor Quảng Nam dôl geh âk trong ntop kơl nuĭh ƀon lan ƀư pâl nđaih nsum mpôl lam ƀon lan.

  Ƀon pâl nđaih nsum  mpôl lam ƀon lan Trà Nhiêu, nkuâl Duy Xuyên ngai đah nkual ƀon têh Hội An nklăp 5 km n’hanh ngai đah nkual ƀon têh Đà Nẵng 30 km. Ta aơ geh 10 héc ta bri đung dak đah âk ƀon hăr blău ti kan  uĕh êng.

  Nô Phạm Minh Tâm, kruanh an manh duk kruh Cô Mốt, ta xã Duy Vinh ƀư pâl nđaih hŏ 7 năm aơ, lơn âk rhŏ dŏng an năch uănh pâl bri đung, drăng jal. Nar dŭt âk, ntŭk nô wơt nklăp 50 tât 100 năch, lơn âk năch dak bah dih. Rnoh khlay manh duk kruh, ngêt sa hŭch hao ntơm bah 200.000 tât 250.000/nuĭh. Nô Phạm Minh Tâm an gĭt, ntŭk nô geh 15 bôk duk kruh, nta joi nău kan an âk nuĭh kan ta ntŭk:

“Năch pâl nđaih tât uănh pâl bri tơm đung lôch nê wah ncho duk. He saơ geh rhŏ ndơ ngêt sa nŭng nar an năch pâl nđaih. Du tơ̆ ncho ntơm bah 6 tât 7 kruh  geh 14 tât 16 năch, 2 hê ncho nsum du kruh lah rnoh khlay 100 rbăn prăk, hôm sông nar uănh tĭng nău ŭch đă bah năch. Ŭch năch pâl nđaih tât hăn pâl âk, săk gâp nơm n’hanh nuĭh ƀon lan dŭt rhơn nđơr yor nsĭt geh wăng sa ăp nar”.

Năch pâl nđaih tât Trà Nhiêu nar lơn ma âk, nta trong dơh an ăp ntŭk kan wăng sa pâl nđaih n’hao nău geh, nuĭh ƀon lan ta ntŭk ntop geh tay tơm wăng sa. Aƀaơ ta ƀon Trà Nhiêu geh nklăp 15-20 nuĭh ƀon lan râng rmôt duk kruh bah nô Phạm Minh Tâm. Wa Đỗ Thị Sáng, nuĭh ƀon lan thôn Trà Đông, xã Duy Vinh lah, ntơm nơh ƀư nău kan mir ba man tŏng sa dơm. Ntơm bah rnôk ƀon pâl nđaih jêng, păng hŏ râng lăp tâm rmôt rhŏ dŏng duk kruh,  nsĭt geh bar pe rhiăng rbăn prăk du nar.

“Mpôl hên tâm rmôt wah duk kruh, njŭn leo năch hăn  ŭanh pâl  bri đung n’hanh seng jal, geh rnôk năch dŭt âk. Geh năch pâl nđaih tât nuĭh ƀon lan  dŭt rhơn nđơr, nsĭt geh wăng sa nkơng nău rêh ăp nar”.

Ur sai wa Trần Thị Xì n’hanh wa Trần Văn Hùng ta thôn Trà Đông, xã Duy Vinh ƀư du ntŭk tăch ndơ an năch rlu jâng. Năch hăn tât ta aơ, dơi rlong sa ăp ndơ sa  kah khlay kơt mì Quảng, trău djăr, bánh cuốn... ur sai wa Xì hôm ƀư ăp ndơ nsĭt nkah ndray ma ngâr kloh uĕh đah ntŭk gŭ rêh kơt ŭnh đeng bĭch, đèn lồng, nsưng mpan…gay tăch an năch. Wa Xì an gĭt: 

“Ntơm nơh  ƀư nău kan mir ba dŭt jêr  jŏt ngăn, aƀaơ rnăk rgâl ƀư  rhŏ dŏng pâl nđaih, nău rêh mbơm oi lơn. Khay geh năch âk nsĭt geh  bar pe jât rkeh prăk. He lơn âk rhŏ dŏng ndơ sa an năch, hôm sai ƀư tanh tôk tanh jêng ăp ndơ nkah ndray ma ngâr nkar n’hanh njŭn leo năch hăn uănh pâl".

Ta ƀon pâl nđaih nsum mpôl Trà Nhiêu geh 5 rnăk ƀư pâl nđaih rlong ŭanh saơ. Ƀon pâl nđaih Trà Nhiêu dôl geh hun hao âk n’gâng kan rhŏ dŏng an nău kan pâl nđaih rlong saơ kơt: seng jal ta dak me, tanh mbêl cói, tanh tôk way ơm, n’gon ndrănh. Năm 2010, ƀon pâl nđaih nsum mpôl lam ƀon lan Trà Nhiêu jêng, ntơm bah nê tât aƀaơ pơk trong an  âk nuĭh ƀon lan hun hao pâl nđaih. Wa Nguyễn Sáu, kruanh UBND xã Duy Vinh, nkuâl Duy Xuyên an gĭt âk rnăk ntơm nơh jêr jŏt aƀaơ hŏ nsan hao geh mbơm oi.

“Mpôl hên ŭch rŏng mpŏng lah pâl nđaih bah n’gor hun hao gay  rgâl dăp rgum nuĭh  kan. Tâm ƀon geh 5 rnăk ƀư pâl nđaih, nsĭt geh wăng sa nta joi dơi nău kan n’hanh wăng sa bah khân păng geh mbơm oi lơn. Nău kan pâl nđaih njêng đăt ndal mpeh hun hao wăng sa. Ŭch rŏng ƀon pâl nđaih nsum mpôl Trà Nhiêu dơi gưl bah lơ uănh khlay ntuh kơl tay âk ntŭk wơt năch n’hanh ăp ntŭk pla n’hơ ndơ geh ƀư pâl nđaih bah n’gor gay wăch rgum năch pâl nđaih n’hanh ntĭm nti an nuĭh ƀon lan geh nău gĭt âk mpeh pah kan pâl nđaih”.

Aƀaơ, pâl nđaih nsum mpôl lam ƀon lan n’hanh pâl nđaih bri dak dôl hun hao âk ta ăp nkuâl n’gor Quảng Nam. Âk ntŭk hŏ njêng rmôt tâm boh, hợp tác xã pâl nđaih nsum mpôl. Wa Hồ Quang Bửu, Groi kruanh UBND n’gor Quảng Nam an gĭt, n’gor hŏ geh âk trong kơl nuĭh ƀon lan ƀư pâl nđaih, kơi năp nti nău blău rhŏ dŏng năch pâl nđaih, njŭn leo kônh wa hăn uănh pâl, kơt nti ăp ntŭk êng ƀa ƀă. Ăp ntŭk ntĭt leo pâl nđaih mô dơn rgop ƀư âk mpưm ndơ geh ƀư pâl nđaih, hun hao wăng sa ma nkre đah hun hao pâl nđaih đah văn hóa.  

“Aƀaơ, n’gor ntrŭt nsôr hun hao trong ntĭt leo pâl nđaih nsum mpôl, ăp ƀon hăr blău ti  kan pâl nđaih n’hanh pâl nđaih thôn ƀon. Mpôl hên geh ăp trong nchrăp rđău đă ăp nkuâl lah ân ntop kơl ma âk ntil trong ƀư, ntop kơl an pâl nđaih nsum mpôl, pâl nđaih thôn ƀon dja nkre kan nsum krêp dêh đah Hội An, Mỹ Sơn n’hanh pâl nđaih mpeh dak  lêng bah Quảng Nam. Mpôl hên nsing nơm lah hun hao  pâl nđaih thôn ƀon geh tâm nkrêp tâm lăp văn hóa nsum hŏ nsĭt tay rnoh khlay âk an ăp nuĭh ƀư pâl nđaih nơm tâm thôn ƀon tâm ban kơt ăp nuĭh ƀư pâl nđaih nsum mpôl lam ƀon lan”.