Dŏng công nghệ mhe ta nău kan tăm sầu riêng, wa Lê Văn Thành ta xã Ea Yông, nkuăl Krông Păc, n’gor Đăk Lăk mô hôm geh mĭn rvê dak tŏ mô tŏng, mơh rnôk poh phân, mô lah ăp nar mô ru mô dơi hăn chop mir. Aƀaơ wa lĕ đăp mpăn hôm yor lah lĕ rngôch mpeh rnoh n’ĭt, nău ŭch dak, nar pah kan…lĕ geh ntŭk ƀư đah ndơ rƀet ueh êng kơp dơn n’hanh mbơh sŏng dăng bâh điện thoaị.

Wa Lê Văn Thành nkoch, mbra dơi geh uănh năl nău n’ĭt n’hanh geh rƀet uănh bâh ngai, mir tơm sầu riêng rlău 3ha bâh wa hôm nha geh ueh nđir, bol ma trôk nar mô geh ueh.  “Geh công nghệ aơ nuĭh ƀon lan dơh ƀư lơn, geh dŏng ndơ aơ he dơi gĭt tâm neh he mơh ndơ mô tŏng, mơh ndơ phân he poh, dak tŏ tŏng đŏng lah mô gay ma mât tăm an tâm di lơn”.

Hôm wa Hroda Ayun ta xã Ea Kênh, nkuăl Krông Păc an gĭt, rnôk geh đă mpeh nău geh n’hanh nău ueh ăp nar lơ ma âk, ƀon lank an lŏ mir an geh rgâl gay ma an tâm di. Rnăk vâl wa lĕ ntơm geh rgâl bâh ntơm tăm cà phê way ơm tât mât tăm cà phê ueh mhe. Ăp nău pah kan geh ƀư êng rƀet lât bâh ngai da dê kơt: tŏ dak ntruh, poh phân êng, ntŭk ŭnh măt nar nchrat ang…lĕ kơl an ƀon lan kan bah ir mât chăm, bah ir hoach dak tŏ, poh phân, ntuh kơl ndơ kan mô ir hoach.

Tĭng nău mbơh bâh wa Hroda Ayun, bol ma rnoh prăk ntrŭp bôk năp khlay, yơn nău geh dŭt tâm di ngăn, ngăn lah tâm rnôk rơh pah kan an geh ueh kloh – ndơ dŏng ueh kloh kơt aƀaơ.

 “Pah kan tăm cà phê dơh nơih mô dơn lah kơl n’huch bah ir nsuk djơh ntŭk gŭ rêh ma hôm nha geh mât neh, rnoh dak tŏ n’hanh ntŭk gŭ rêh. Nuĭh ƀon lan hôm nha geh nău geh âk ma hôm nha geh mât săk soan bâh nơm n’hanh ntŭk rêh jêng”.

Ta nău kan têh lơn,HTX dịch vụ tuch tăm kloh ueh nkuăl Krông Păc, n’gor Đăk Lăk lĕ dŏng công nghệ rnoh mbrô ta rlău 200ha sầu riêng Vietgap. Wa Mai Đình Thọ, Kruanh Hôị đồng quản trị HTX an gĭt, nău tâm rgop pah kan dŏng công nghệ rnoh mbrô mô dơn n’hao nău khlăy geh ndơ ma hôm nha geh njêng rnoh khlăy mhe an ntil ndơ sầu riêng bâh nău ƀư kloh ueh ăp ntil ndơ pah kan. Tât aơ tay, HTX mbra geh ƀư ntrŭp mã QR an ăp mir gay ma mât uănh ta rnoh mbrô  , kơl gĭt na nê̆ tu tơm, ntŭk tăm n’hanh gĭt na nê̆ mir sầu riêng. Bâh nĕ, nkre lah n’hao nău tâm knơm đah nuĭh dŏng ndơ, nkre n’hao nău khlăy ndơ.Wa Mai Đình Thọ, an gĭt:

 “Kỹ thuật rnoh mbrô kơl an ăp rnoh mbrô ƀư an kloh rjăp lơn an nuĭh doưng. Ăp mir tơm, ăp tơm geh nău ntơ êng, gĭt ntŭk tăm nar tăm nău mât tăm..nuĭh dŏng dơh gĭt năl ndơ ueh mô lah mô ueh. Ăp ntŭk kan mât uănh dơh gĭt năl nău uănh nđôi lơn đŏng”.

Tuch tăm aƀaơ hôm nha lah trong kan tơm, geh klâp ma 1/3 ndơ geh mpeh n’gâng kan wăng sa ta Đăk Lăk. Yor nĕ, n’gâng kan tuch tăm n’gor lĕ geh mbơh tơih, kơl an ƀon lan n’hanh doanh nghiệp geh gĭt rgâl mhe rnoh mbrô tâm nău pah kan, tăch rgâl, tăch dŏng ndơ geh ƀư. Tât aƀaơ, âk ƀon lank an lŏ mir lĕ geh gĭt dăch đah trong kan tuch tăm ueh mhe, n’hao nău dơi mât uănh n’hanh uănh nđôi n’hanh mât uănh nău pah kan jan sa. Đah nău pah kan tăch rgâl, âk ntil ndơ OCOP n’hanh ntil ndơ tuch tăm ntoh lư lĕ geh ndơ̆ ta ntŭk tăch rgâl điện tử mô lah ta ăp ntŭk mạng xã hôị gay ma mbơh n’hơ, tăch ta mạng.

Gay ma n’hao tay lơn săk rnglăy rgâl mhe rnoh mbrô tâm nău kan tuch tăm, wa Nguyễn Thiên Văn, groi kruanh UBND n’gor Đăk Lăk an gĭt.

"N’gor dôl mbơh tơih ăp nău kan kơl an, tâm nĕ geh dŏng công nghệ mhe, rgâl mhe rnoh mbrô ta trong rdâk njêng nău ntơ, ndơ ntơ, rdâk njêng rnoh mbrô tăm ndrel đah rnoh kach, dŏng công nghệ mbrô. Bâh nĕ kơl an rnoh ndơ ntơ ntil ndơ tuch tăm ta n’gor Đăk Lăk ăp nar lơ ma n’hao, tâm ban kơt geh rnoh khlăy, nsĭt tay nău geh ueh an nuĭh ƀon lank an lŏ mir n’hanh doanh nghiệp.

Rgâl mhe rnoh mbrô dôl ntơm an saơ na nê̆ nău kan tơm tâm nău n’hao rnoh khlăy ndơ tuch tăm, pơk hvi ntŭk tăch rgâl n’hanh ntrôl hun hao wăng sa nkual ƀon lan ta Đăk Lăk. Nău tâm rgop na nê̆ đah n’gâng kan, doanh nghiệp n’hanh nuĭh ƀon lan mbra lah nău khlăy gay ma rdâk njêng du n’gâng kan tuch tăm ueh mhe, nâp nâl n’hanh lăp kan ndrel têh hvi ăp ntŭk.

……………….