Ntơm bah nau nsôih rgâl mhe, nsôih ƀư sâm geh tâm nkuăl neh ƀon nơm, jêh âk năm mĭn, ndrel ma nau bonh đă bah ăp gưl uỷ, n’gâng kan tâm nkual, nô Y Hưng Niê, đảng viên chi bộ ƀon Trăp, xã Ea H’Đing, nkuăl Cư M’gar n’gor Dak Lak hŏ ndâk rmôt kan tuch tăm nsum tâm xã Ea H’Đing. Râng nau kan nsum lah ăp đoàn viên, druh ndăm geh nau gơih, mra kơt tĭng ăp nau kan mhe tâm nau kan tuch tăm. Jêh 3 năm ndâk, tât rnôk aơ, ntŭk tâm boh ƀư nau kan geh 25 nŭih ndrel rlau 500 nŭih ƀư ba dih. Âk nau kan mhe, nau kan ueh hŏ leo nsĭt nau geh jêng văng sa. Nô Y Hưng Niê mbơh, đah nau kan: Rong be, tăm ba, tăm cà phê, tiêu, sầu riêng nâp nâl, ăp năm, ăp rnăk râng ƀư nau kan leo nsĭt ntơm 50 rkeh tât du rmen prăk:

            “Nau kan hun hao văng sa bah nkuăl lah nau kan khlay, ngăn lah văng sa nsum, hun hao tuch tăm, mât rong, pâl n’aih nsum mpôl. Ŭch lah nơm mra kơl an ân âk nŭih hun hao ăp nau kan geh nau dơi ngăn ân săk nơm ndrel nkual. Ngăn lah ntŭk tâm boh ƀư nau kan geh du chi bộ ƀư kan bah đảng bộ xã Ea H’Đinh gay rƀŏng trong kơl an ân kônh wa hun hao tay”.

            Janh mĭn, janh kan lah nau mbơh bah âk nŭih tâm nkuăl têh Quảng Phú, nkuăl Cư M’gar, n’gor Dak Lak rnôk nkoch tât nô Dương Văn Ngọc, du hê đảng viên mom, ntoh lư tâm nau kan tâm rlong pah kan jan sa. Nô Ngọc mbơh: Ndơn saơ nau dŏng nar lơn ma âk, năm 2019, nô hŏ ntrơn 4 ha cà phê kranh gay ma tăm sầu riêng tĭng trong hưũ cơ, tâm rgop ma ntrong tŏ dak têm. Tât rnôk aơ, nau kan tăm sầu riêng tĭng trong hữu cơ bah rnăk nô bôk năp hŏ leo nsĭt nau văng sa prêh, rnôk ma nau dŏng ntuh kơl ƀư kan huch rlau 20%, yơn nau geh, nau nâp ri âk rlau bar tŏ. Nau kan dôl geh ăp rnăk ƀon lan êp nê râng, kơt nti, ƀư âk. Nô Dương Văn Ngọc mbơh, lah đảng viên ri ma nơm ân leo trong lor tâm ăp nau kan, leo trong hăn kơt nê mơ gay ƀon lan rnơm nơm ndrel ma kơt tĭng:

            ‘Rnôk nơm râng ăp nau kan Đoàn, Đảng ri nơm geh kơt tĭng ăp nau kan ueh, ăp nau kan geh săk tam tă bah nê nơm ƀư tĭng ân rnăk nơm pah kan ân geh săk rnglay lơn. Tâm rơh tât, nơm mra nsôih dăp rgum nau kan rnăk vâl ndrel ăp nau kan êng êng gay râng ƀư ân ueh nâp lơn”.

            Mô êng knŭng leo trong tâm ăp nau kan hun hao văng sa, ăp đảng viên geh nau dơi lơn hôm râng nau kan rgop tơm prăk, njêng tơm prăk ân ăp rnăk vâl geh nau rêh jêr jŏt manh ma mô sŏk prăk kon. Ntơm bah tơm prăk aơ, âk rnăk hŏ đăp mpăn pah kan jan sa, rlet nau jêr, rklaih ach o. Tâm Phường Đoàn Kết, nkuăl têh Buôn Hồ, n’gor Dak Lak, wa Hà Ngọc Cẩn, đảng viên chi bộ Tổ dân phố 2 lah ngoai tâm ăp đảng viên râng nau kan aơ. Wa Cẩn mbơh, bol ma prăk rgop mô âk, yơn đah nuih n’hâm kơl an, ăp đảng viên kơt wa ŭch geh du gưl bonh đă ăp rnăk ach o nsôih gay hun hao.

            ‘Tâm aơ kônh wa lah nsum lah rnăk ƀon lan geh prăk trok nkre, geh rnăk ri bu rvăt chan gay ma tât yan lôch geh kăch rek ri mơ bu tăch ndơ geh prăk mơ bu trok. Ndri ma rnôk saơ kônh wa geh nau jêr ri nơm kŏ kơlan ân kônh wa chan, mô geh sŏk prăk kon’.

            Ntơm bah ăp nau kan ba lơ ân saơ, âk đảng viên tâm Dak Lak hŏ ƀư ueh nau kan leo trong lor, jêng ăp nŭih cán bộ blau, ăp công dân leo trong lor, ntoh ngăn tâm nau kan pah kan jan sa, jut n’huch ach o, huch ach o, ndrel nsum ndâk njêng ƀon lan nar lơn ma sâm geh./.