Tơm me sầu riêng Krông Pắc bah n’gor Dak Lak hŏ nchrăp an khay klêh n’hanh nchrăp an Lễ hội Sầu riêng tâl 2, tâm bôk khay 9 tât. Mô dơn lah ntŭk tăm sầu riêng dŭt têh hvi, đah rlău 8.000 héc ta hŏ an klêh play, Krông Pắc hôm lah ntŭk rgum rvăt, tâl nklâm, tăch n’gluh sầu riêng bah Dak Lak n’hanh lam nkual Tây Nguyên. Đăp mpăn an khay klêh, n’gâng kan ăp gưl ta nkuâl Krông Pắc dôl n’hao dăng pah kan đăp mpăn hăn ntung trong, rnă njrăng, groi nđôi nău kan tăch – rvăt n’hanh đăp mpăn kah uĕh play.

- Hơi wa, ntop kơl ƀon lan n’hanh doanh nghiệp rgum rvăt, tăch n’gluh sầu riêng, n’gâng kan ta ntŭk hŏ mhâm ƀư an trong nkra mêh?  

 Wa Trần Hồng Tiến: Thường vụ Huyện uỷ hŏ rđău đă an ƀư klêh play sầu riêng năm aơ. Aƀaơ, UBND nkuâl hŏ njêng ăp mpôl hăn pah kan ôp uănh; ăp n’gâng kan kơt công an, tuch tăm... n’hao dăng đăp mpăn rnă njrăng an khay klêh sầu riêng năm aơ, đăp mpăn mô an geh nău ăp nuĭh mhĭk djơh sreh lơh n’hang sầu riêng nse khuch tât drăp ndơ n’hanh nău mĭn rvê tâm ƀon lan.  

- Lăp tâm khay klêh play sầu riêng, Krông Pắc mbra wơt âk nuĭh kan ta ăp ntŭk êng tât, ndrĭ pah kan mât uănh nuĭh, đăp mpăn rnă njrăng dơi nkuâl mhâm nchrăp mêh, hơi wa? 

 Wa Trần Hồng Tiến: Mpôl hên hŏ rđău đă du mpôl hăn jŭr pah kan na nê̆ ta ăp nkual geh âk tơm sầu riêng ta nkuâl, n’hao dăng pah kan mât uănh đah nuĭh kan tât bah ăp  n’gor êng ƀa ƀă, đăp mpăn  nô nău rnă njrăng, nuĭh kan  nta joi geh nău kan ta ntŭk.  Rđău đă rmôt rgop âk n’gâng kan n’hao dăng pah kan ôp uănh, ra joi, ntĭm nti ăp doanh nghiệp ký ton rnôk n’hao công nhân tât rgum rvăt nkret njêng sầu riêng, ký ton  đah ăp rnăk ƀon lan kan lŏ mir, hợp tác xã ân di rêng siƀŭt si tra quy định bah pháp luật, gay der bah jêng nău mpeh nuĭh rvăt – bah nuĭh tăch mô tĭng jăp nău tâm ton nsum.

- Quốc lộ 26 hăn rlău nkuâl Krông Pắc dŭt lhăt bêng, nchroh jêr tŏng geh trong hăn tă bah hao âk ndal ndeh hăn rdeng sầu riêng tâm khay klêh. Gay der bah nău lhăt bêng trong hăn, nkuâl hŏ mhâm geh trong nkra mêh, hơi wa?

Wa Trần Hồng Tiến: Mpôl hên hŏ  jao an Công an, Jrô kan wăng sa – ndơ dŏng rdâk njêng ăp trong nchrăp tâm pă mbor trong hăn, sơch ăp ntŭk soih gay an nsrŭng ăp ndeh container, der bah nsrŭng ta ăp meng trong me…lhăt nchep trong hăn. Aƀaơ, mpôl hên hŏ ôp uănh, sơch du đêt nkual tach chưng play, jâng gung nsrŭng ndeh bah ăp công ty gay ntop kơl ăp nuĭh tơm ndeh rdeng ndơ n’glăp rgum ndeh nsrŭng, rhŏ dŏng an nău rvăt sầu riêng bah kônh wa.

- Gay hun hao jŏ jong n’gâng kan sầu riêng, nău đăp mpăn săk kah uĕh play rnôk klêh lah dŭt khlay dâk bôk năp. Nkô̆ nău dja mhâm dơi ƀư mêh, hơi wa?

Wa Trần Hồng Tiến: Gay đăp mpăn ƀư an sầu riêng kah uĕh âk, mpôl hên rđău đă an lam trong kan chính trị n’hao dăng pah kan  nkoch trêng, rgŏ jă ƀon lan, rnôk klêh, tăch sầu riêng, ân tŏng dŭm, đăp mpăn săk kah, mât nău nsing nơm an săk ntơ lư Sầu riêng Krông Pắc, n’hanh mhâm ƀư mât dơi nău nsing nơm đah ăp doanh nghiệp.          

- Ơ, dăn lah uĕh wa!