Hội Nông dân n’gor Dak Lak aƀaơ geh 102 ntŭk Hội đah bơi 300 rbăn nuĭh. Jêh dăp nsum ntŭk kan hành chính, ƀư tĭng ntrong kan ƀon lan 2 gưl n’hanh dăp nsum thôn, ƀon, tổ dân phố, đă rgâl mrô, hun hao wăng sa rmôt n’hanh ndâk njêng thôn ƀon mhe n’gluh đă rgâl mhe têh dăng nkô̆ nău, trong ƀư pah kan bah chi hội tĭng trong ngăn ngên, săk rnglăy.

Ta rgum nchră, ăp đại biểu nkoch âk ntrong ƀư, trong ƀư săk rnglăy n’hanh dăn đă trong mkra rgâl mhe nău kan chi hội tĭng trong êp nău ŭch bah nuĭh tâm rmôt, ntrôl dăng rgâl mrô n’hanh hun hao ăp nuĭh, rmôt nuĭh nău kan hăn ndrel đah nkra njêng tĭng trong khlay. Wa Vũ Thị Thúy Hòa, Kruanh Hội nông dân xă Ea Drăng nkoch nău blău ơm bah xă:

 “Ŭch hăn ndrel đah ƀon lan ri bôk năp an dơi wât moh ndơ gay he ntop kơl di n’hanh an tâm trŭp nău rƀŏng bah nơm n’gluh an. N’hanh jêh rnôk nglăp nsum đăp mpăn ntrong ƀư mhe ri tiăr nti tay na nê̆. djôt ty ntĭm nău kan an tĭng đồng chí chi hội trưởng gay mbơh ƀư n’hanh nău mât uănh lĕ rngôch trong văn hóa điện tử lĕ dơi nglăp lĕ rngôch tâm Google Form”.

Bah meng ăp ntrong ƀư săk rnglăy, âk đại biểu ntĭm ăp jêr jŏt tâm nău kan chi hội jêh nglăp nsum ntŭk kan hành chính, ngăn lah đă rgâl mrô đah rmôt cán bộ bah dâng. Wa Châu Thị Hồng Thảo, Kruanh Hội Nông dân xă Hòa Mỹ nkoch dăn đă bah nău ngăn ta bah dâng:“Dăn đă Hội nông dân n’gor tiăr nti mpeh rgâl mrô, pơk na nê̆ ăp jrô AI geh tât đah tĭng nuĭh tâm rmôt, rmôt ta bah dâng, gay ăp nuĭh ƀon lan ta lam xă gĭt da dê n’hanh dŏng công nghệ AI, lơn lah tâm nău aƀaơ hin lah rlăm ta ntŭk ntô mạng lah du nău dŭt geh ngăch”.

Ăp đại biểu tâm ban ŭch an lah nău rgâl mhe nkô̆ nău, n’hao uĕh pah kan chi hội an ơm dơi na nê̆ đah ăp trong mkra tâm di đah nău geh ngăn bah tĭng ntŭk, tĭng ntŭk Hội. Wa H’Giang Niê, Kruanh Hội nông dân n’gor Dak Lak an gĭt, ăp nău rgop, tâm nchră mô knŭng nkoch âk ntrong ƀư, trong kan săk rnglăy ma hôm dăn đă âk trong mkra ngăn ngên gay n’hao ueh pah kan bah rmôt kan Hội:"Ăp nkô̆ nău dơi tâm rgâl tâm ban ŭch an ơm dơi rgâl na nê̆ jêng ăp bôk nău kan, tĭng chi hội. Yor nê, ăp gưl Hội nông dân, du chi hội an mât nău ƀư tơm, nuih n’hâm nchrăp lor, mĭn ƀư mhe, rgâl mhe tâm rmôy ƀư tĭng, jêng an rgâl na nê̆ mpeh ueh nâp nău kan chi hội. Mpôl hên mbra rgum tŏng ăp lĕ rngôch ăp nău rgop, dăn đă gay mĭn njêng ntop tay, ndơ̆ tâm ăp nkô̆ nău bôk nău kan tâm năm tât”.