Gay geh nău rêh rmeh kơt nar aơ, ur sai nô Đường n’hanh yuh Nẫm ta thôn 4, xã Trà Tân, n’gor Lâm Đồng hŏ rlău ăp nar khay krit jêr, joi sa. Nău dŭt rnê ta ur sai nô Đường n’hanh yuh Nẫm, nê lah nuih n’hâm klaih rlău jêr jŏt, nău tâm ban ŭch n’hanh krêp dêh mir ba wăng sa gay klaih rlău ach o n’hanh nsan hao geh nău rêh đăp mpăn.

Ntơm bah bar pe sào neh bôk năp bah me bơ̆ bar ding an, ur sai yuh nsrôih rgâl si tăm gay nsĭt geh wăng sa. Ntơm bah tăm ba, tiêu, cà phê, tât tăm điều, rnga, mbo,… saơ tơm I geh rnoh khlay lah yuh nô n’glăp tăm, nkre rgâl uĕh jêng neh, n’hao săk geh play, nkre njêng geh tơm wăng sa an rnăk wâl.

Rlău ma tuch tăm, yuh nô hôm mât rong sŭr, ndrôk, be đŏng... Rnôk geh ndơ ntêm, ndơ sa, yuh nô rvăt tay neh pơk hvi tuch tăm. Aƀaơ rnăk yuh nô geh 6ha điều dôl an klêh play, 1ha ba lŏ, 2ha neh tăm tơm glêh nar kơt mbo, rnga, tuh…an nsĭt geh wăng sa đăp mpăn bơi rhiăng rkeh prăk ăp năm.

Yuh Võ Thị Nẫm an gĭt, saơ rnoh khlay cà phê mhe aơ hao tay, rnăk yuh hŏ tăm rlŭ tơm cà phê tâm mir điều n’hanh mbra dơi tăm tay tiêu lah rnoh khlay uĕh.

Ntơm nơh tăm tiêu, cà phê nsĭt geh wăng sa âk, yơn tơm tiêu mô geh nâp jong kơt tơm cà phê n’hanh tơm điều, jêng bar hê ur sai n’glêh an rgâl jêng tăm điều lĕ. N’hanh aƀaơ dôl an klêh. Bar hê ur sai mĭn đŏng lôch nê mơ tăm rlău 1ha cà phê tâm mir điều. Lah uĕh lăng ri jêh aơ tay mbra lơh tơm điều tăm rlŭ tơm tiêu tâm mir cà phê.

 Gay tuch tăm nsĭt geh wăng sa âk, ur sai yuh nsrôih râng ăp jrô kơi năp nti, dŏng ăp rgâl mhe khoa học kĩ thuật ndrel đah nê lah joi gĭt n’hanh rƀah gĭt ntŭk tăch ăp ntil ndơ tuch tăm aƀaơ gay geh trong rƀŏng rgâl tơm tăm tâm di, nsĭt tay nău geh wăng sa âk.

Nô Võ Văn Đường nkoch, ur sai nô ntơm nơh tăm tiêu, cà phê đŏng yơn lôch tiêu, cà phê jŭr thuk da dê, jêng mơ lơh tiêu, cà phê jêng tăm mbo, điều, yor rnôk nê điều geh rnoh khlay.

Aƀaơ he tĭng ntĭm nti bah cán bộ tuch tăm ƀư tĭng trong ntĭt leo tăm điều đêt dŏng phân hóa học, lơn âk dŏng phân ndrung n’gor, pih rhe... saơ uĕh jêng đŏng. Uănh nsum, aƀaơ ƀư tĭng trong khoa học mpeh ntrŭt nsôr tuch tăm dơn rnê he ƀư saơ nsĭt geh âk lơn dơm.

Gay ntik hvi nău kan tuch tăm, ur sai yuh nô mô an neh rlu, nău mir ba mô gŭ ru wăr năm, lĕ rek ba, donh điều tât mbo, rnga. Nô Đường an gĭt tay, khay rek rnga mhe aơ geh rnoh khlay rlău 60 rbăn prăk/kg, rnăk yuh nô nsĭt geh wăng sa đăp mpăn.

Ŭch rŏng Ngih dak mât uănh đŏng, mpeh n’gâng kan tuch tăm kơi năp nti tăm ăp ntil tơm tâm di, nkre săk geh âk play nkre ât dơi đah duh phang, tăch geh rnoh khlay đăp mpăn nsĭt geh wăng sa âk lơn.

Mô dơn ƀư wăng sa jăp blău, rnăk yuh nô hôm dâk leo lor tâm ăp nău kan, trong leo ƀư ta thôn, xã, kơt: râng rdâk njêng ƀon lan mhe, rdâk njêng rnăk văn hoá, gĭt tâm rnglăp, ntop kơl kônh wa gay ndrel hun hao. Ôp mpeh nuih n’hâm nsrôih klaih rlău jêr jŏt bah ur sai nô Đường n’hanh yuh Nẫm, wa Lâm Văn Nhu, Kruanh thôn 4, xã Trà Tân, n’gor Lâm Đồng an gĭt:

 Tâm thôn 4 geh rnăk wa Võ Văn Đường lah rnăk ƀon lan kan lŏ mir wăng sa jăp blău, bôk năp, rnăk wâl dŭt jêr jŏt đŏng, yơn tât aƀaơ wăng sa rnăk wâl hŏ hun hao đăp mpăn, nơm geh tăm điều, rnga, mbo, ba,... Kon khân păng geh nuĭh hăn nghĩa vụ công an, du hê ri hăn tahen. Lĕ bar hê ur sai dŭt nsrôih wăng sa, rnăk geh 5-6 ha điều, wăng sa đăp mpăn.

 Ur sai nô Đường n’hanh yuh Nẫm lah ăp nuĭh ƀon lan kan lŏ mir, mô kă rnam krit jêr ta me neh bah he nơm, jêng mô dơn klach rlău ach o ma hôm nsan hao jêng rnăk geh mbơm oi, dơi âk kônh wa tâm thôn lĕ nuih n’hâm rnê, uănh lah nuĭh ntĭt leo lor gay kơt nti n’hanh ƀư tĭng.