7 khay ba năp, rnoh pah kan jan sa công nghiệp bâh Đăk Lăk hao bơi tât 14% đah khay aơ năm e, tâm nĕ công nghiệp nkret ƀư, njêng nău kan hao bơi tât 15%, pah kan nkra ƀư n’hanh pă điện hao rlău 12%. Gay ma ntop an geh nău ŭch hun hao wăng sa bâh 10% let lơ, Đăk Lăk geh nău nchrăp mpŏng rnoh mbrô pah kan công nghiệp 5 khay dŭt năm hao bơi tat 20%.

Kruanh UBND n’gor Đăk Lăk Đỗ Hưũ Huy an gĭt, n’gor mbra rgum mât uănh pah kan ƀư ăp ngih máy aƀaơ geh, doh rklaih ăp nău kan gay ma ndơ̆ ăp nău nchrăp kan mhe lăp pah kan tâm năm aơ, nkre lah ntrôl dăng nkret ƀư têh n’hanh an geh âk công nghiệp công nghệ mhe, công nghiệp kơl kan ndrel đah logistics. “Mpôl hên ntrôl ngăch ăp nău nchrăp kan công nghiệp mhe ta nău pah kan mhe ta ăp nau kan tâm năm 2026. Rgâl mhe têh dăng tât nkret ƀư , n’hao nău geh âk rnoh khlăy an hun hao tâm ban kơt rdâk njêng nău ntơ mpeh ndơ tuch tăm. an geh âk, săch ăp nău kan công nghệ mhe, công nghiệp kơl kan, lôch nĕ lah nău pah kan jan sa tâm pleh ndrel đah nău kan bâh logistics. Mpôl hên mbra geh mât đăp mpăn rnă njrăng ŭnh nar, tâm rgop na nê̆ gay ma ƀư ueh nău kan ăp nău ŭnh nar mhe njêng tay bâh n’gor, n’hanh mbra tâm ton uănh n’hêl an tâm di ŭch đah nău ntrŭnh ntuh kơl ơm ngăn an ăp nău nchrăp kan mô geh kŏ văk tât neh bri”.

Mpeh ŭnh nar, n’gor Đăk Lăk lĕ geh ŭch đah nău ntrŭnh ntuh kơl 19 nău nchrăp kan đah lĕ rnoh âk rlău 1.217MW, 4 ngih máy điện sial, lĕ rnoh công suất 200MW lĕ geh an dŏng kan. Đăk Lăk dăn đă n’gâng kan Công thương kơl an n’hao nău dơi rnoh ŭnh nar mhe geh njêng tay tâm nău nchrăp điện VIII rgâl nkra, hun hao điện sial ta dak lêng n’hanh ntrôl ngăch ntuh kơl trong điện an dŏng.

Groi Kruanh n’gâng kan công thương Trương Thanh Hoài uănh năl Đăk Lăk geh nău dơi têh ngăn mpeh ŭnh nar, ndơ tuch tăm yơn an geh du trong kan hun hao mhe, tâm rgop đah ntŭk kan mpeh nhâp nar n’hanh mpeh luh nar, tâm ne mpeh đah nhâp nar hun hao công nghiệp nkret ƀư, hôm mpeh luh nar mbra dơi rgum công nghiệp nkra ƀư n’hanh sŏk dŏng ŭnh nar. “Nkual mpeh luh nar lah ntŭk geh dŏng điện dŭt âk, yơn mpeh nhâp nar lah ntŭk ƀư jêng điện dŭt têh. Jêng lah uănh kơp tay mhâm ƀư an geh rgâl ăp ntŭk kan công nghiệp jâk mpeh luh nar gay ma dŏng an du gưl ŭnh nar rnoh nkra njêng điện ta mpeh nhâp nar. Nău aơ an geh du ntrong kan ntŭk kan gay ma hun hao mhe, gâp mĭn n’gor an geh mbơh nău mpŏng kan na nê̆ tay tâm  rơh hun hao lvang năm tât 2030 n’hanh mpŏng uănh tât năm 2035-2045.

Groi kruanh n’gâng kan lĕ đă n’gor Đăk Lăk ngăch ƀư ăp ntil săm ƀŭt ntuh kơl, ngăn lah ăp nău kan ƀư điện, nkre lah ntrôl ngăch ăp nău kan mbơh tơih dŏng điện tơm khlăy. N’gâng kan Công thương mbra mbơh tơih đah Chính phủ an geh ƀư nău kan tâm rgop bâh ntŭk rêh jêng, ntuh kơl tĭng trong BOT đah trong điện gay ma rgum lĕ rnoh tâm rgop bah dih tơm prăk ngih dak.

 Nam Trang/VOV Tây Nguyên