Tâm mâp tâm nđur play Sầu riêng Đăk Lăk năm 2026 mbra geh ƀư bâh lơ 15/8 tât 2/9, đah klâp ma 1 rbăn đại biểu ăp n’gor, nkuăl ƀon têh, ăp n’gâng kan ntŭk kan Trung ương n’hanh rlău 400 đại biểu lam ntur neh. Ndrel đah ăp mpôl bu năch tât, rơh tam mâp nchrăp geh 25 tât 30 rbăn bu năch tâm dak n’hanh dak bah dih tât râng.

Gay ma mât đăp mpăn kloh ueh ndơ sông sa ta rơh tâm mâp tâm nđur, n’gâng kan dak si n’gor Đăk Lăk lĕ geh rdâk njêng nău nchrăp kan, mbơh tơih tât ăp ntŭk geh ƀư nău kan. Nkre lah uănh nđôi, uănh năl tay ntŭk gŭ rlu an bu năch mpơeh nău dơi ueh đăp mpăn hăn nsong, njrăng rdâng rtoh ŭnh sa n’hanh kloh ueh ndơ sông sa.

N’gâng kan dak si lĕ ntrôl dăng nău mbơh tơih, đă ƀon lan, nuĭh tăm sầu riêng n’hanh ăp ntŭk kan tăch rgâl du ntŭk, n’hanh ăp ntŭk an geh ƀư tĭng răng dăng ăp nău ntrŭnh mpeh mât đăp mpăn ndơ sông sa ta năp, tâm n’hanh lôch rơh tâm mâp tam nđur. Wa Trần Quang Hưng, groi kruanh mât rnă njrăng đăp mpăn ndơ sông sa, ntŭk kan dak si n’gor Đăk Lăk an gĭt. “Ntŭk kan dak si n’gor Đăk Lăk lĕ geh njêng 2 mpôl kan uănh nđôi. Du mpôl kan uănh nđôi ăp ntŭk tăch rgâl mpeh ndơ sông sa kơl an bu năch ta rơh lễ hội. mpôl hôm e uănh năl ăp ntŭk kan vơt năch, an năch gŭ răk ngêt sông ntĭm ƀư ăp rơh răk ngêt sông yor UBND n’gor ƀư, kơl an đại biểu. Ta meng nĕ, ăp mpôl kan bâh ntŭk kan dak si lĕ uănh năl rơh tâm rlong ndơ sông sa, ăp ndrơng ndơ pla n’hơ ntil ndơ gay ma mât đăp mpăn kloh ueh đăp mpăn ndơ sông sa.

Tuấn Long/VOV Tây Nguyên