Tâm nău tâm nchră ngơi dêh mêr, tâm knơm n’hanh geh âk nău kan ndrel, bar hê Thủ tướng lĕ uănh năl nău pah kan tâm kơl kan ndrel Việt Nam- Hà Lan tâm ba năp nơh, tâm mbơh n’hanh dơn ngoăy ăp nău mpŏng kan gay ma sok dŏng geh săk rnglăy nău dơi, ndơ̆ nău tâm boh kan lĕ rngôch hao ta rnoh âk lơn yor nău geh ueh bâh 2 dak. Bar ding an geh n’hao tay lơn nău tâm rnglăp tâm mbơh kan, ngăn lah nău kan gưl prêh, n’hao nău tâm knơm mpeh chính trị, mpŏng tât n’hao nău tâm boh kan ndrel hao du njoat mhe, nkre lah đă an geh tâm rgop tay, tâm kơl tay ta ăp rơh tâm mâp âk ding n’hanh lam ntur neh. Bar hê Thủ tướng lĕ tâm mbơh mpeh ăp nău ta nkual n’hanh lam ntur neh ndrel mât uănh, lah na nê̆ nău khlăy bâh trong kan tơm bâh nău mât đăp mpăn ueh lăng rnă njrăng, mât đăp mpăn n’hanh ueh lăng ăp ntil ndơ tăch rgâl ta dak lêng, trong hăn ta trôk ta nkual n’hanh ta lam ntur neh, bâh nău ryơk luật pháp lam ntur neh ngăn lah công ước mpeh Luật dak lêng 1982 (UNCLOS). Rơh tâm nchră ngơi bôk năp đah 2 Thủ tướng Việt Nam n’hanh Hà Lan lĕ geh nău dơi ueh, đah ăp nău mpŏng kan tâm kơl kan mhe, pơk luh du trong hun hao geh âk nău dơi an nău tâm boh kan lĕ rngôch Việt Nam- Hà Lan.