Ta rƀŭn nchră, ăp đại biểu uănh năl, nău pă an rnoh mbrô nkual tăm n'hanh rnoh mbrô ntŭk tâl dŭng lah nău khlay gay ndơ tuch tăm râng tăch n'gluh tĭng trong me. Yơn lah, gay mât uĕh săk rnglăy, ăp ntŭk, hợp tác xã, doanh nghiệp n'hanh nuĭh tuch tăm ân uănh khlay mât uĕh nău dơi tuch tăm, mât njrăng ndơ bu tuh, dŏng dak si mât njrăng si tăm di nău way n'hanh mbơh kloh rwah nău kan tuch tăm.

Yơ Hồ Thị Bích Kiều, Kruanh jrô kan wăng sa xă Ea Knuếc, mbơh ăp nău kol ngăn ân geh rơih jăng: "Aƀaơ hin, xă dôl jêr jŏt tâm nău nchrŏng năl ntŭk gŭ bah tĭng rnoh neh tĭng nău ntrŭnh, yor geh tât ăp công ty, doanh nghiệp cà phê. Ta neh aƀaơ ăp công ty dŭt âk tăm cà phê, yơn rnôk ƀư rnoh mbrô nkual tăm êng an tĭng ntil tơm ri ntoh luh nău wăk kol tâm nău ntrŏng năl moh săk, n'har nkual tăm. Bah meng ăp nău jêr jŏt aơ, ta ntŭk an dơi ntop kơl mpeh nău way kan, ntĭm ƀư di nău ntrŭnh".

 Ăp ntoh măt lĕ tâm pă nău blău ngăn tâm nău ƀư nău kan tuch tăm ndrel tâm rgop tăch rgâl nkre đah rnoh mrô nkuăl tăm. Ntoh măt ntŭk kan tăch rgâl, ntŭk tâm boh kan nsum ân lah, rnoh mrô nkual tăm knŭng ƀư ueh nău dơi rnôk nkrel đah nău kan mêt uănh êng, nchih nkah nău kan tuch tăm ndrel dŏng phần mềm joi tu tơm. Nău tĭng nău kan tuch tăm lah nău khlay gay ma mât nău knơm mrô nkual tăm, der nău khuch geh ntŭk rvăt nglăp mbơh mô lah sŏk lơi mrô nkual tăm.

Wa Lê Quốc Thanh, Giám đốc Ntŭk rgum ntrŭt nsôr tuch tăm gưl ngih dak, lah rjăp gưl rnoh mbrô nkual tăm mhe knŭng lah nău bôk năp; nkô̆ nău khlay lơn lah leo ƀư tuch tăm n'hanh mât dŏng rnoh mbrô gay ndơ tuch tăm tât đăp mpăn ăp ntŭk tăch. "He ân nchrŏng kloh dơi lah nău khlay kan, nău dơi, nău geh, nău dơn kan tĭng nuĭh tơm ƀư du gâl tâm rgop. Lah nuĭh tơm nkra njêng ân nchrŏng kloh dơi nău khlay kan bah he rnôk râng. Doanh nghiệp tâm ban kơt nê đŏng, lơn lah ngih pah kan ngih dak, ngih pah kan way kan, mpôl kan ntrŭt nsôr tuch tăm. Kơt nê̆ ri mơ rdâk njêng dơi rnoh mbrô nkual tăm gay tât dơi ntŭk tăch rgâl".