Rlău du khay aơ, nuĭh rwăt na nao ôp đah wa Lê Văn Thành ta thôn Phước Hòa, xă Ea Yông, nkuăl Krông Pắc, n’gor Dak Lak gay nchăm khlay sầu riêng tâm nkual mir rlău 2 ha bah wa. Ndrĭ yơn wa Lê Văn Thành an gĭt, bôl rnoh khlay nuĭh rwăt nchăm lah dŭt khlay, geh bah 70.000-85.000/kg an ntil sầu riêng Dona yơn wa mô tăch.

Aƀaơ ta aơ lah nsum khân pơng nchăm âk rnoh khlay ngăn. Đah rnăk wâl hôm nklăp 5 tât 10 nar tay lah yan pĕ ri rnăk wâl mư nchăm gay mât uĕh ngăn an yan sầu riêng aơ n’hanh an rnoh khlay đăp mpăn lơn.

Lah ngoăy tâm 2 ntŭk bah n’gor Dak Lak lĕ dơi Cục Sở hưũ trí tuệ, N’gang kan Khoa học-Công nghệ pă an kơp dơn “Ntô lĭr sầu riêng nsum”, nkuăl Krông pắc dôl nsrôih ndâk njêng, mĭn lah nuĭh rwăt tă bah uĕh kah ndơ. Wa Trần Hồng Tiến, Bí thư Nkuăl uỷ an gĭt, đah rnoh neh rlău 8.000 ha, năm aơ, nchrăp rnoh geh sầu riêng bah Việt Nam geh rlău 92.000 tấn. N’hanh rhoăt nău blău ơm nău bah năp đaơ du đêt lôk ndơ sầu riêng bah Việt Nam geh mpeh Trung Quốc mplơ̆ sĭt yor mô tâm di ăp nău uĕh kah tăch n’gluh, nkuăl dôl n’hao trong kan aơ.

Nkuăl dôl rgum ntĭm rđău n’hao mât uănh mã nkual tăm. Lơn lah an geh nchih nkra njêng tĭng di đăp mpăn. Tal 2 lah mpôl hên dôlrgum n’hao rgŏ jă nuĭh ƀon lan nkra njêng sầu riêng du trong đăp mpăn nsĭt tay uĕh kah, nsing nơm uĕh ngăn mư đăp mpăn hun hao sầu riêng nâp nâl.

Lam n’gor geh 23 ntŭk tâl dŭng n’hanh 68 nkual tăm dơi pă mã mrô rhŏ an tăch n’gluh. 2 nkuăl lĕ dơi Cục sở hữu trí tuệ pă an kơp dơn dăn ntô lĭr sầu riêng rgum lah Krông Pắc n’hanh Cư M’gar. 2 nkuăl dôl ndâk njêng bôk nău rgop tâm nchră dăn mât njrăng ntô lĭr lah Krông Buk n’hanh Ea H’leo. Tĭng wa Nguyễn Văn Hà, Groi Giám đốc N’gâng kan Tuch tăm mât rong n’hanh hun hao ƀon lan n’gor Dak Lak, aơ lah nkô̆ nău gay n’gor rƀŏng tât hun hao ndoh ndơ sầu riêng nâp nâl tâm di tĭng nău ŭch ntŭk rwăt. Yor nê, nău kan mpeh bah mât uănh ngih dak, ndrel đah nău uănh tât dăp rgum, mât uănh mrô nkual tăm, ntŭk tâl dŭng, ƀư trong tâm rgop... n’gor dŭt uănh tât mât uănh uĕh kah.

Bah mpeh ngih dak, ta gưl nkuăl n’hanh gưl n’gor mpôl hên mbra uănh nđôi ăp ndơ rmeh ta mir, kơt du đêt ntŭk gay rhŏ trong kan mât uănh gay ơm geh nău mbơh. Dêr nău nsĭt tât n’har bri jêh nĕ an djôt sĭt. Nău aơ dŭt khuch, mô knŭng khuch mpeh wăng sa ma hôm mpeh nsing nơm n’hanh dŭt âk ntil tay.

Gay đăp mpăn rnă njrăng tâm yan pĕ sầu riêng, n’gâng kan ƀon lan n’hanh rmôt công an ăp ntŭk tâm n’gor Dak Lak lĕ ndâk njêng, mbơh ƀư trong nchrăp n’hao trong kan njrăng n’gang nău tih n’hanh nău ƀư tih tâm yan sầu riêng năm 2024. Nkre uănh nđôi ntŭk mât prăp, hăn groi nđôi ta ăp ntŭk, ngăn lah ăp mir sầu riêng ngai jay, groi nđôi ăp nău ƀư rwăt, tăch sầu riêng, ndâk njêng rmôt ntop kơl pĕ n’hanh tăch sầu riêng. Đại tá Trần Quang Hiếu, Groi Giám đốc Công an n’gor Dak Lak an gĭt:

Mpôl hên mbra nchrăp gĭt nu nău, tâm rgop đah ăp n’gâng kan nău kan n’hao mât uănh ngih dak mpeh rnă njrăng wăng sa, lơn lah geh tât mã mrô nkual tăm, mã tâl dŭng n’hanh ăp nău ƀư mplư rlăm tăch rgâl. N’hanh ngăch saơ njrăng n’gang rmal rjăp ăp nuĭh geh nău ntŭng rmoănh. N’hao mât uănh ngih dak mpeh nău ƀư nglăp tăch, mpeh ntung trong, mpeh mât uănh nău kan tăch rgâl geh nău dơi đăp mpăn rnă njrăng ta ntŭk.

N’gor Dak Lak aƀaơ geh bơi 33.000ha tăm sầu riêng, tâm nĕ geh nklăp 16.000 ha lĕ play, lah n’gor geh rnoh neh sầu riêng têh ngăn lam dak. Năm 2023, sầu riêng DaK Lak geh 285.000 tấn n’hanh năm aơ nchroh mbơh mbra geh rlău 300.000 tấn. Gay tâm di nău ŭch ntŭk tăch n’gluh, Dak Lak an n’hao lơn tay nău mât uănh, ƀư nkra njêng bah du đêt hợp tác xã, rmôt kan ndrel; mât uănh uĕh mã mrô nkual tăm; n’hao nkoch trêng n’hao nău wât bah nuĭh ƀon lan mpeh tâm di uĕh bah bah tu tơm.