Lah du hê bu ndăm lôch năm pah kan mir, yơn rnơm gơih lă kan ndrel ngăch tâm nau kan tuch tăm, janh leo lăp dŏng nau kan mhe tâm nau kan tuch tăm, nô K’Đức, tâm xã Đinh Trang Thượng, nkuăl Di Linh, n’gor Lâm Đồng jêng nŭih geh nau blau ngăn bah ƀon lan ndrel geh rnglăp tâm rmôt kan Đảng. Jêh rnôk lah đảng viên, K’Đức hŏ nar lơn ƀư ueh nau kan leo trong lor, nsôih blau tâm nau kan bonh đă ƀon lan ntrơn rgâl tơm tăm mpa rong, tăm byăp play tĭng trong n’hao nau geh tăch:

 ‘Đah nau dơi lah du hê đảng viên mom, tâm rơh rlau aơ, gâp hŏ ƀư ueh nau kan, nsôih tâm nau kan bah Đảng ủy ndrel rđau kan tâm nkuăl jao. Tâm nê geh nau kan leo trong lor tâm nau kan hun hao tuch tăm, ntrơn rgâl tơm tăm n’hao nau săk geh ân rnăk vâl ndrel rgŏ jă ƀon lan kơt tĭng. Kơt Wa Hồ hŏ ntĭm đảng viên hăn lor gay ƀon lan tĭng bah kơi”.

Tâm ban ma nê, đảng viên K’Ly tâm xã Tân Thượng, nkuăl Di Linh kŏ ƀư ueh nau kan hun hao văng sa ndrel nau rêh gay kônh wa tâm ƀon kơt tĭng ƀư. Ntơm nar ndâk nkra dơi nau kan tăm tơm ƀăng tây tĭng nau bu đă rvăt, mir wa K’Ly jêng ntŭk gay ma nkoch mbơh, rgum âk mpưm nŭih tâm nkuăl tât joi uănh ndrel kơt. K’Ly mbơh, ŭch rgala nau kan tuch tăm bah ƀon kan ri nơm ân geh ƀư lor đah ăp nau kan ngăn ngên mơ:

 “Gay nŭih ƀon lan geh prăk ăp nar, săk gâp nơm hŏ hăn leo lor tâm nau kan tăm tơm ƀăng tây gay ma sŏk tơm gleh nar rong tơm jong nar, geh bŭih ƀon lan kơt uănh ndrel ƀư tĭng. Rnôk aơ tơm ƀăng tay geh ntŭk tăch luh, rnoh tăch ntơm 70 rbăn tât 100 rbăn/kg, âk nŭih bu hăn rvăt joi tât tâm mir tăm ma nơm kŏ mô tŏng geh gay ma tăch. Tât jêh aơ tă, gâp mra nsôih pơk ân hvi lơn tay nau kan aơ gay kônh wa geh prăk ăp nar, đăp mpăn nau rêh bah nơm”.

Tĭng đảng viên K’Brao, Bí thư Chi bộ thôn Hàng Ùng, xã Bảo Thuận, nkuăl Di Linh, nau kan ƀư ueh lơn tay nau leo trong lor bah đảng viên tâm nau hun hao nau kan tuch tăm ndrel nau rêh tâm ăp ƀon lan rnoi mpôl đê̆ lah ngoai tâm ăp nau kan dŭt n’hâm khlay geh Đảng bộ nkuăl Di Linh ngăn ngên uănh khlay gay ma ntrŭt dăng ƀư. Ndri ma, ŭch rgâl nau mĭn, nau kan bah ƀon lan, đảng viên tâm chi bộ ân ƀa ƀơ tâm nchră ndrel ndâk ăp nau kan hun hao văng sa ân tâm di ndrel săk tam. Geh kơt nê mơ kônh wa rnơm ndrel kơt tĭng:

‘Bah năp nơh, yor tăm cà phê nơm yơng êng kon ntil ri ma nau geh mô lăng geh âk. Ntơm nar geh dŏng ntil cà phê mhe 38 cà phê ndop ri ân geh nau săk rnglay bah cà phê âk lơn ngăn rđil bah năp nê. Kônh wa saơ nơm blau ƀư geh săk tam ri ma âk nŭih kơt tĭng ndrel ƀư tĭng gay hun hao văng sa, n’hao nau rêh”.

Nkuăl Di Linh rnôk aơ geh 4.400 đảng viên, tâm nê geh rlau 900 đảng viên lah nŭih rnoi mpôl đê̆. Rnơm geh ăp nŭih đảng viên aơ lah ăp nŭih leo trong lor, mro ƀư ăp nau kan ntơm njêng, rgop nau ƀư rgâl nau mĭn, nau kan tâm ăp ƀon lan nŭih rnoi mpôl đê̆, rgop nau ƀư ueh ngăn tâm nau hun hao văng sa, rêh jêng bah nkuăl Di Linh lah êng ndrel n’gor Lâm Đồng lah nsum./.