Nău nchrăp ƀư trong dêr wăng sa mpeh bah lơ nkual ƀon têh Pleiku geh jong 15 km, prăk ntuh kơl rlău 1.300 rmen prăk, kơl nthoi nkual ƀon têh đah ăp nkuăl Đăk Đoa, Chư Păh, hăn rgăn ăp ntŭk pâl nđaih ntoh lư bah n’gor. Săk kuăl “ndring wăng sa” an saơ n’gor Gia Lai n’gluh an âk nău mpŏng tâm nău nchrăp ƀư aơ, yơn nău nchrăp ƀư dôl lah ntoh lư bah nău ndâk ƀư mbrơi ngăch.

Bôl ntơm rdâk ƀư bah dŭt năm 2022, dơi mpŏng soih trong hăn an dŏng n’gul năm 2025, ndrĭ yơn tât aƀaơ rnoh nglăp ndơ dŏng aơ mhe knŭng geh 46%, sŏk an tơm prăk bơi 740 rmen prăk. Tĭng wa Phạm Xuân Điệp-Giám đốc Ban mât uănh nău nchrăp ƀư ntuh kơl ndâk ƀư n’gor Gia Lai, ntŭk kan dôl dŭt nsrôih gay mkra nu nău aơ:

Tĭng nkô̆ nău ntĭm rđău bah Chính phủ n’hanh UBND n’gor, tĭng trong nchrăp năm aơ ri an sŏk ndơ̆ prăk geh đêt ngăn 95%. Tĭng nkô̆ nău rƀŏng nĕ, Ban mât uănh geh âk ntĭm rđău na nê̆ đah tĭng nău nchrăp ƀư na nê̆, ngăn lah đah ăp ndơ ƀư khlay gay đăp mpăn lôch jêh nău rƀŏng sŏk an tơm prăk tâm năm. Mpeh bôk năp ăp jêr jŏt, wăk kol ta ăp ndơ ƀư lĕ dơi dôh rklaih.

Ta nkuăl Chư Păh, ngăch sŏk an tơm prăk ntuh kơl nsum lơ mbrơi lơn. Tâm dĭng lĕ 117 rmen prăk bah năm 2025, nkuăl mhe sŏk an prăk rlău 3 rmen prăk, knŭng geh rlău 2% trong nchrăp. Ăp nău nchrăp ƀư ndâk ƀư bôk năp ta Chư Păh, dŭt âk tâm rmôt rgâl tay; ăp nău nchrăp ƀư mhe dôl kâp jêh sam ƀŭt. Wa Đặng Thái Huy-Giám đốc Ban mât uănh nău nchrăp ƀư ntuh kơl ndâk ƀư nkuăl Chư Păh (Gia Lai) an gĭt, du gưl jêr jŏt lah yor khuch bah trong kan nglăp nsum ăp ngih pah kan, ntŭk kan ta nkuăl.

Yor mhe aơ nău nglăp nsum tĭng sam ƀŭt ntĭm rđău bah n’gor lah rlu du đêt ndơ ƀư n’hanh geh tât gưl xă ri mpôl mât uănh mbrơi sŏk an prăk. Êp tât tâm khay 5, khay 6 aơ mpôl mât uănh mbra an rnoh ndơ bah ăp ntŭk kan ndranh gay n’hao rnoh ndơ ƀư n’hanh rnoh sŏk an prăk bah nkuăl.

N’gor Gia Lai dơi jao trong nchrăp prăk ntuh kơl hun hao rlău 4.500 rmen prăk, geh rnoh prăk năm 2025 n’hanh prăk njuăl bah năm 2024. Tâm nĕ, tơm prăk n’gor rlău 22.600 rmen prăk, hôm ƀa ƀă tơm prăk trung ương bơi 1.900 rmen prăk. Yơn lah, tât aƀaơ hôm e 12 nkuăl, nkual têh mô hŏ tâm pă lĕ trong nchrăp prăk ntuh kơl nsum dơi jao, ƀư rnoh sŏk an prăk geh rlău 10%, du đêt hôm e đêt nkôp đah nău đă n’gluh an.

Ta năp nău ngăn aơ, n’gor Gia Lai dơi mbơh ƀư rĭng âk trong mkra dŭt n’hâm. Tâm nĕ ndâk ƀư 4 rmôt kan yor ăp Groi Kruanh n’gor mât uănh.

Ăp rmôt aơ rgum ntrŭt đă trong kan sŏk neh, nkra rgâl nău ntrŭnh trok neh n’hanh ngăch tâm pă prăk. Đah nău nsrôih âk n’hanh nău lăp lĕ rngôch tă bah n’gor tât bah dâng. Gia Lai dôl ntơm dôh rklaih ăp ntŭk kol tâm nău sŏk an tơm prăk ntuh kơl nsum. Wa Rah Lan Chung-Kruanh UBND n’gor Gia Lai-lah rjăp:

Trung ương dôl geh âk trong nchrŏng mbơh geh săk rnglăy ăp nău nchrăp ƀư ntuh kơl. N’gor lĕ ndâk ƀư trong mkra n’hanh geh trong nchrăp mbơh ƀư tĭng sam ƀŭt aơ. Kơp uănh tay uănh lah n’hanh rgŏ jă ăp tơm prăk nkre rgŏ jă ăp nuĭh nkre soih n’hanh dôh rklaih ăp ntŭk kol. M’hâm ƀư lĕ rngôch ndơ geh bah ƀon lan dơi mât uĕh ta rnoh âk ngăn gay rgŏ jă ăp tơm prăk ndrel ty ndrel đah n’gâng kan ta ntŭk gay ƀư tĭng ăp nău ntrŭnh mpeh hun hao wăng sa, aơ lah ngoăy tâm âk nău dŭt n’hâm khlay.