Lôch sa piăng măng, yuh H Ninh Êban, ta buôn Tà Đốp xã Ea Hiu, nkuăl Krông Păch, n’gor Đăk Lăk ntĭnh ntăn ăp oh kon nti ren lôch nĕ ndăn hăn ta ntŭk mât rong sĭm rlêng Quế Loan gay ma donh rsoăn sĭm. Nău kan aơ kơl an yuh geh tay nău geh klâp ma 6 rkeh prăk ăp khay, n’hanh geh uănh năl săm săk soan 2 tơ̆ tâm du năm.“Gâp pah kan ta aơ lĕ geh 3 năm hôm, ndăn ƀư tay bah dih mông hành chính. Rđil đah ntơm rĭ nău geh 3 năm ba năp lĕ đăp mpăn n’hanh âk lơn đah ba năp, tŏng prăk kan dŏng tâm rnăk vâl. Nău kan aơ dơh yor lah tâm nđik, mô geh duh nar, tâm geh jêr đŏng, kanŭng nsrôih dơm”.

Ndrel đah yuh H Ninh, geh 3 yuh êng lĕ tât rang dŏnh rsoăn sĭm rlêng ta ntŭk mât sĭm rlêng Quế Loan ta xã Ea Hiu, nkuăl Krông Păch. Bol ma kanŭng ƀư ta măng mô lah mông ru dơm, nău kan aơ nsĭt tât an oh yuh nău geh đăp mpăn bâh 5-7 rkeh prăk tâm du khay. Oh Lê Bảo Anh Niê, ta ƀon Roang Dơng, xã Ea Hiu, mhe 16 năm deh dơm yơn lĕ geh 3 năm tă pah kan donh n’hanh dăp rsoăn rlêng.“Rnôk hôm nha jê̆ rĭ gâp tĭng mê̆ kan uănh mê̆ ƀư nkre geh mê̆ ntĭm tâm 1 pơh lah gâp blău ƀư. Lah mê̆ donh rĭ gâp mbra kơl an mê̆ săch rse n’hanh donh rsoăn hăch, geh rnoh prăk đê̆ đăch gay ma xăng ndeh, sa ôi đŏng”.

Kơt nti nău kan bâh yuh H Loan, bar pe jât rnăk vâl ta xã Ea Hiu lĕ geh rong n’hanh leo sĭm rlêng. Rlău jay mât leo sĭm rlêng ta Đăk Lăk, yuh H’Loan lĕ pơk tay 3 jay rlêng êng ta nkuăl Ia Grai, n’gor Gia Lai. Yuh nsrôih nti nău kĩ thuâtj, kơl ntuk tăch an rnăk vâl ƀư rong sĭm rlêng n’hanh pă nău kan ƀa ƀơ an 4 hê yuh rnoi đê̆. Yuh Mó H Loan nkoch, tâm săk yuh geh 2 dak mham lah Rđe n’hanh Bru Vân Kiêù, yuh mbơh lĕ 2 nău ngơi gĭt na nê̆ jêng lah dơh tâm ngơi đah ăp oh yuh tâm nău pah kan. Yuh nsrôih pah kan, kơt nti ăp nău kan mhe ta mạng Internet gay ma nkre dŏng an săk nơm, nkre ntĭm nti tay an nuĭh ŭch gĭt. Bol ma nău kan ta n’gâng kan ntĭm nti , âk nău mô ru yor yơn yuh hôm geh nău nchrăp pơk jay mât rong hvi lơn gay ma dơi pă nău kan tay an âk nuĭh.“Gâp dôl nsrôih ndơ̆ ntil ndơ an hao 4-5 sao, mbra dơi pă nău kan an 12 nuĭh kan, nsrôih gay ma ntil ndơ geh tât ta ntŭk tăch rgâl ueh lơn. Ŭch lah nuĭh leo kan ta ntŭk geh mât kơl tay, nta nău dơh nơih, tâm rgop, mbơh nău tăch rvăt, ndơ̆ ntil ndơ geh bư ta ntŭk tăch rgâl an dak bah dih âk lơn.

Aƀaơ, ăp 3 khay yuh H Loan geh 12kg rsoăn rlêng rêh, nkre geh tăch song dăng an ăp ntŭk nkret ƀư rsoăn rlêng rêh ta nkuăl ƀon têh Hồ Chí Minh, nkre leh ƀư săch kloh gay ma tăch an ntŭk tăch rgâl. Đah rnoh khlăy 30 rkeh prăk/kg rsoăn rlêng lĕ geh ƀư donh kloh, ăp năm yuh H Loan geh rlău 1 rmen prăk. Mô dơn pơk trong hun hao mhe an nău wăng sa nâp nâl, nău kan aơ an saơ nău rgâl mhe nău mĭn, ntơm mĭn nău kan bâh nkual neh jêr gay ma ƀư sâm geh.