Ăp ôi, ƀon lan ăp ƀon Vơng Chép, Keo, Tung Ke ta xã Ayun, nkuăl Chư Sê ndrel têk ndrôk tât ntŭk m’ơk chiăp. Tât nsrŭp măng, khân păng rgum veng ndrôk sĭt ta ndrung nsum gay ma mât uănh. Tĭng nău mbơh bâh nô Đinh Suyn - kruanh rmôt rong ndrôk deh kon ta ƀon Keo, xã Ayun, ƀon lan ntơm nơh lĕ tă geh kơl rong ndrôk deh kon, yơn nĕ lah kơl an ăp rnăk rong êng. 2 năm aơ ƀon lan mơ geh kơl gay ma mât rong rgum nsum. Đinh Suyn an gĭt trong kan kơl aơ n’hanh leo ƀư mât rong mhe lĕ nta nău dơh nơih gay ma ƀon lan tâm mbơh nău kan, nău rhơn n’hanh trong pah kan jan sa.

“Bâh ntơm geh Ngih dak kơl an ndrôk săk gâp nơm dut rhơn dŭt ŭch ƀư sâm geh, mpeh nău koh pih an ndrôk sa. Yor ndrôk me dôl geh bŭn n’hanh ta năp kơi păng mbra deh kon jêng gâp saơ rhơn ngăn. Ndrôk deh rĭ he rong dơm, tât ba kơi lah deh âk rĭ tăch gay ma hun hao wăng sa kơt rvăt phân poh, dak si, tơm tăm”.

Đah nô Kpui Đe- Kruanh rmôt rong ndrôk deh kon, ƀon H Vawk, xã Ayun kơt ne đŏng, Nô an gĭt, bâh ntơm nău mĭn rvê bôk năp mhe dơn mât, aƀaơ ƀon lan lĕ dŭt rhơn ngăn.

 “Tâm nuih n’hâm bâh săk Kpui Đe nơm rhơn ngăn, ntơm nơh mê̆ bŏ mô geh ndơ  tât aƀaơ ngih dak kơl an nơm rong ndrôk rĭ aƀaơ rnăk gâl rong ndrôk lĕ deh kon hôm rĭ gâp nsrôih mât rong n’hanh mhâm ƀư an ueh lăy. Lôch rek ba rĭ sŏk rhe gay ma ƀư ndơ sa an ndrôk ta khay wai, lĕ geh mbơh đah ƀon lan lôch rek ba sŏk lĕ rhe sĭt ta jay an ndrôk sa, mô hôm su kơt ntơm nơh”

Xã Ayun geh rlău 95% rnoh nuĭh lah ƀon lan rnoi đê̆, nău rêh wăng sa mâp âk nău jêr yor neh tăm lĕ sât blak n’hanh trôk nar duh ir, nău kan mât rong ndrôk deh kon lĕ nsĭt tay nău geh mĭn ueh mhe. Tâm 2 năm ba năp, bôk nău kan lĕ kơl an 65 rnăk ach o n’hanh dăch ach o tâm lĕ rnoh 327 rnăk jêr jŏ ta xã Ayun. Tât aƀaơ, ăp ndrôk geh kơl an bâh năm 2023 lĕ ntơm deh kon, nsĭt tay nău geh mhe, ƀư n’hao nău knơm n’hanh nău nsrôih an ƀon lan.

Wa Phạm Ngọc Tuấn- groi kruanh UBND xã Ayun, nkuăl Chư Sê, n’gor Gia Lai uănh năl. Nău kan mô dơn rlu tay ta nău kơl nău rêh jêng ma hôm nha ndâk nsơm nău ŭch bah ach o, n’hao nău gĭt vât n’hanh nău mĭn dơn kan bâh nuĭh ƀon lan. Ăp ndrôk dăng ueh, ăp nău rhơn bâh ăp rơh ndrôk deh kon bôk năp le an saơ nău ntrŭnh di ngăn.

 “Bâh rlău 2 năm ƀư nău kan 3 kơl an nău mât rong pahkan kơl  ndrôk deh kon an ƀon lan lĕ ntơm geh săk rnglăy. Lĕ mât rong tĭng rmôt rnăk rĭ nău mĭn, nău gĭt vât bâh nuĭh ƀon lan geh n’hao, tâm rlong pah kan mât rong n’hanh uănh nđôi ndrel, bâh ne dơi geh ăp nău geh âk lơn đah ăp năm ntơm nơh ting trong mât rong rnăk vâl, nău kan mât rong mô dơn geh mât đăp mpăn jêng tât săk rnglăy mô âk. bâh 2 năm ƀư tĭng bôk nău kan lĕ kơl an ƀon lan năp lor lah n’hao nău gĭt vât, nău kan bâh nuĭh ƀon lan lah mât rong ndrôk an deh kon gay ma n’huch ach o nâp nâl”.

Kơl an ndrôk deh kon gay ma ƀon lan rnoi đê̆ hun hao nău kan mât rong, n’hao nău geh, lah nău kan lĕ geh ƀư âk năm ta n’gor Gia Lai n’hanh lĕ lah na nê̆ geh săk rnglăy. Rlău ma ndrôk ntil geh rvăt bâh prăk bôk nău kan nkô̆ mpŏng ngih dak, âk ntŭk kan, n’gâng kan ta n’gor lĕ pă an ndrôk deh kon, ntop tay nău dơi an nău pah kan n’huch ach o. Ăp nău rgâl mhe mpeh trong kan n’hanh nău dơi bâh xã Ayun, nkuăl Chư Sê an saơ, nău kan aơ bâh Gia Lai dôl geh ƀư lôch. Ăp ndrôk têh dăng, ăp rơh kon ndrôk mhe deh, mô dơi nsĭt tay nău geh âk ma hôm nha ndâk nsơm nău nsrôih ta ăp rnăk vâl. Aơ lah nău kan dŭt khlăy gay ma ăp gâl kan n’gâng kan ta Gia Lai geh pơk hvi nău kan, ntop n’huch ngăch rnoh ach o ta ntŭk.