Mât jĭl bêk sŏk nkre lô, trong rƀŏng hăn mhe bah ƀon lan Cơ Tu nkuâl Nam Giang, n’gor Quảng Nam
Thứ năm, 10:16, 24/04/2025 VOV/Nuĭh rblang: Điểu Thân VOV/Nuĭh rblang: Điểu Thân
VOV.M'NÔNG- Mât jĭl bêk sŏk nke lô dôl rơ̆ jêng âk ta nkuâl mpeh yôk yang Nam Giang, n’gor Quảng Nam. Trong leo ƀư dja bôk năp hŏ kơl ƀon lan Cơ Tu rgâl trong kan mât rong gay hun hao wăng sa, rgâl geh nău rêh n’hanh n’hao geh nău rêh. Ntơm bah nê, âk rnăk klaih rlău ach o jŏ jong.

 

  Mât jĭl bêk sŏk nke lô dôl rơ̆ jêng âk ta nkuâl mpeh yôk yang Nam Giang, n’gor Quảng Nam. Trong leo ƀư dja bôk năp hŏ kơl ƀon lan Cơ Tu rgâl trong kan mât rong gay hun hao wăng sa, rgâl geh nău rêh n’hanh n’hao geh nău rêh. Ntơm bah nê, âk rnăk klaih rlău ach o jŏ jong.

  Nău dăp rgum si tăm ndơ mât geh nău khlay tâm hun hao wăng sa tuch tăm mât rong. Aơ lah ngoăy tâm ăp trong nkra kơl nuĭh ƀon lan rdâk njêng trong ntĭt leo geh nău dơi tam, nsĭt geh wăng sa âk. Bơi 2 năm aơ, trong leo mât jĭl bêk sŏk nke lô dôl hao rơ̆ jêng âk ta nkuâl mpeh yôk yang Nam Giang, n’gor Quảng Nam.  

Năm e nơh, yuh La Thị Sâm ndrel rmôt 5 rnăk ta thôn Mực, thị trấn Thạnh Mỹ, nkuâl Nam Giang, n’gor Quảng Nam dơi ntop kơl 20 mblâm jĭl bêk tĭng rmôt rnăk tâm pă nar mât chăm nsum. Lôch 6 khay, jĭl bêk hŏ an luh nke lô tăch. Yuh La Thị Sâm an gĭt, rĭng ăp năm, jĭl bêk mbra an koh nke lô bar tơ̆, rnoh khlay tăch ăp ký 10 rkeh prăk. Mât jĭl bêk dơh mât chăm lơn rđĭl đah mât ndơ êng ƀa ƀă. Măt êng hôm ndăn ndơ siăm ơm geh ta ntŭk kơt lha si tâm bri, prit rêh. Tât nar jĭl bêk an luh nke lô ri kơi ntop an sa tay rnih mbum, mbo gay an săk uĕh nke. Ntơm bah du rnăk ach o, jêr jŏt, aƀaơ nău rêh rnăk wâl yuh La Thị Sâm hŏ đăp mpăn.

“Nơm geh n’gâng kan ta ntŭk mât uănh kơl, kon ntil n’hanh ndơ dŏng mât rong tay đŏng, nta trong dơh gay nău rêh bah kônh wa tâm rmôt mât jĭl dơi rgâl geh âk lơn rđĭl đah ntơm nơh. Ntơm nơh, rnăk ƀư mir, manh kan an bu jêng jêr jŏt ngăn. Mpôl hên mhe mât jĭl sŏk nke lô n’hanh nsĭt geh âk lơn rđĭl đah ƀư wăng sa êng ƀa ƀă. He dơn gĭt  mât dơm hôm trong tăch luh geh nuĭh tơm kơl an ntil khân păng ton rvăt lĕ jêng mô rvê. Lah mât chăm uĕh ri an luh nke lô uĕh jong”.

Nkoch mpeh mât rong jĭl bêk ta ntŭk, wa Pơ Loong AÊ, ta xã Tà Bhing, nkuâl Nam Giang nkoch, aơ lah trong leo mhe. Bol jĭl bêk lah ndơ gŭ rêh êng tâm bri yơn hŏ dơi rđăp bên, tâm di đah bri dak neh ntu, trôk nar, nkual mpeh yôk yang; kônh wa mbra ndăn dŏng ndŏk nja ndơ tuch tăm gay siăm, hŭch prăk dŏng mât rong. Wa Pơ Loong AÊ an gĭt tay: mât jĭl bêk dơh ma đêt geh rmoh rman đŏng, nsĭt geh wăng sa rlău mât sŭr, djăr n’hanh ndrôk.

“Mpeh nsĭt geh nklăp 2 tât 3 khay lah jĭl hŏ geh nke lô hôm, kônh wa dŭt rhơn n’hanh nđơr yor geh rnoh khlay wăng sa âk. Mpôl hên geh 5 rnăk mât 20 mblâm, tâm nê geh 15 mblâm jĭl dăm hŏ geh nke lô lĕ, kơp lĕ 100 rkeh prăk tâm du tơ̆ tăch”.

Ta nkuâl Nam Giang, n’gor Quảng Nam aƀaơ geh 200 rnăk lah ƀon lan Cơ Tu râng mât jĭl bêk sŏk nke lô, rgum ta ăp xã Tà Pơ, Cà Dy, Tà Bhing n’hanh thị trấn Thạnh Mỹ. Tĭng wa A Rất Bhen, Groi kruanh Jrô kan tuch tăm n’hanh Môi trường nkuâl Nam Giang, n’gor Quảng Nam, mât jĭl bêk sŏk nke lô an nsĭt geh wăng sa âk rlău ăp ntil ndơ mât way ơm. Ntơm bah ăp tơm prăk ndop, Bôk nău kan n’hŭch ach o jŏ jong gưl neh dak, bôk nău kan hun hao wăng  sa, rêh jêng kon nuĭh nkual ƀon  lan rnoi mpôl đê̆….ăp năm, nkuâl Nam Giang hŏ tâm pă rlău 100 rmen prăk, tâm pă sĭt an ăp nkuâl kơl kônh wa hun hao wăng sa, mât rong tuch tăm….wa A Rất Bhen, an gĭt:

“Trong ntĭt leo mât jĭl bêk, bôk năp nsĭt tay nău geh wăng sa âk. Âk rnăk n’hanh rmôt rnăk hŏ koh nke lô tăch nsĭt geh wăng  sa têh. Let năp tay, nkuâl Nam Giang gŭ mĭn tay gay uănh năl tay trong ntĭt leo dja n’hanh pơk hvi. Âk rnăk râng  mât rong jĭl bêk ntơm bah rnăk ach o n’hanh dăch kêng ach  o aƀaơ hŏ klaih rlău ach o n’hanh nsĭt geh wăng sa đăp mpăn. Jrô kan tuch tăm n’hanh Môi trường râng nsŏng kơl tay đah UBND nkuâl ndơ̆ trong ntĭt leo mât jĭl rơ̆ jêng, nkre đah  ăp đơn vị, tâm rgop kan nsum tâm nkô̆ nău mât chăm n’hanh tăch  ndơ geh ƀư bah rnăk ƀon lan”

Bar pe năm aơ, âk ƀon lan Cơ Tu ta nkual yôk prêh n’gor Quảng Nam ngăch prăl, nănh mĭn, nănh ƀư, nănh ôp joi, rlong rgâl si tăm ndơ mât nsĭt tay nău geh wăng  sa âk. Ndel đah tơm prăk dŏng kan bah Trung ương, n’gor Quảng Nam hŏ ntop kơl ƀon lan rnoi mpôl đê̆, nuĭh ƀon lan nkual jru, nkual ngai joi geh mpeh trong wăng sa, kon ntil gay hun hao wăng sa. Hội Nông dân n’gor Quảng Nam ntop kơl nuĭh ƀon lan mât rơ̆ sŭr, ndrôk deh kon, ndrel du đêt trong ntĭt leo hun hao wăng sa mhe.…nơm geh kơt nê, nău rêh bah nuĭh ƀon lan dơi n’hao kloh, âk rnăk hŏ klaih rlău ach o jŏ jong. Wa Nguyễn Út, Groi kruanh Hội Nông dân n’gor Quảng Nam an gĭt:

“Đah ăp nkuâl mpeh yôk yang kơt Nam Giang, Đông Giang, Phước Sơn kônh wa dŏng tơm prăk manh bah ăp ngân hàng tâm ban kơt bah trong Hội Nông dân ntuh kơl hun hao du đêt trong ntĭt leo nsĭt geh nău tam. Na nê̆ lah trong ntĭt leo mât sŭr ƀon tơm ta ntŭk, mât djăr mƀơk tâm mir, mât jĭl bêk... aơ lah ăp trong ntĭt leo mpeh nsĭt geh wăng sa an nuĭh ƀon lan rgâl geh nău rêh n’hanh hun hao wăng sa. Ăp trong ntĭt leo dja mô dơn klaih rlău ach o ma âk hội viên ƀon  lan ƀư geh ndrŏng n’hanh hŏ rgop an n’gor Quảng Nam âk ndơ geh ƀư OCOP, lơn lah đah  ăp nkuâl mpeh yôk yang dŭt nsĭt geh nău tam. Bah nê njêng luh nău way bên an kônh wa rgum ƀư luh ndơ tăch, ƀư luh ndơ kloh uĕh, ndơ srăch kah”/.  

 

 

 

VOV/Nuĭh rblang: Điểu Thân

Viết bình luận

TIN CÙNG CHUYÊN MỤC