Năm 2023, bol nô nău wăng sa, rêh jêng kon nuĭh geh âk jêr jŏt, yơn nô nău tăch n’gluh ta n’gor Gia Lai hôm tât rnoh geh 680 rkeh USD, hao  3,03% rđĭl đah ndrel khay dja. Tâm  nê, êng n’gâng kan cà phê geh 490 rkeh USD, ăp ntil play do tăch n’gluh geh 120 rkeh USD. Nkoch ta rnôk tâm nchră n’glôch jêh pah kan n’gâng kan công thương, wa Đoàn Ngọc Có- Groi Giám đốc Sở Nông nghiệp n’hanh Phát triển Nông thôn Gia Lai an gĭt, nău dơi dja nơm geh  nău kan nsum lhăt đah n’gâng kan tuch tăm mât rong n’hanh n’gâng kan công thương.

Aƀaơ lam n’gor geh rlău 256.000ha tơm tăm tơm khlay dơi tăm tĭng di ăp rnoh tăch n’gluh kơt GlobalGAP, Rain Forest, Oganic, 4C,… Tâm nê rlău 58.000 ha hŏ dơi kơp dơn ƀoi tĭng tơm luh n’hanh hang rhiăng rbăn ha hŏ gŭ tâm ăp rêng  kan tâm rgop tuch tăm, nkret njêng, đah ƀon lan kan lŏ mir- doanh nghiệp, geh nău tât râng bah rlău 200 hợp tác xã, kơl nău tăch ndơ geh ƀư tơm khlay lơn. Tâm năm 2023, n’gâng kan tuch tăm n’hanh công thương an ƀư âk rơh tâm nchră mpeh hun hao ăp n’gâng kan tuch tăm tĭng trong rƀŏng jŏ jong, leo ƀư pơk hvi ntŭk tăch rgâl uănh khlay ăp dak râng Hiệp định dah rŏng tăch rgâl: kơt EU, Nhật Bản, Hàn Quốc…; ntrôl ngăch tăch rgâl, joi băl tâm boh./.