Mât tâm dăch nau nsing chính trị bah Nau ntrŭnh mrô 10 gay tâm ban tâm nau mât Ngih dak tâm kan mât địa chất ndrel khoáng sản, ngăn lah tâm rnôk mêt uănh ndrel joi khoáng sản. Aơ lah nau đă bah Groi Thủ tướng Trần Hồng Hà tâm rơh rƀŭn mbơh mpeh nau nchrăp Luật địa chất ndrel khoáng sản geh tâm ôi 13/3 ta ntŭk kan Chính phủ.

Tĭng nau mbơh bah N’gâng kan Ntŭk ntu gŭ âm, Nau nchrăp Luật địa chất ndrel Khoáng sản ƀư ngăn ăp tŏng ăp nau ntrŭnh bah Đảng, Ngih dak mpeh nau mât ndoh ndơ ndrel ntŭk ntu gŭ âm, rƀŏng tât nau kan neh ntu, khoáng sản ndrel công nghệ sŏk joi tât năm 2030, rƀŏng tât năm 2045.

Lôch nau tâm nar rƀŭn, Groi Thủ tướng Trần Hồng Hà đă” Tâm nau rgâl bah nau nchrăp Luật, ân geh nkah tât nau kan ê nkra, tăch rgâl, gay jêh nê geh nau ntrŭnh kloh nau kan bah ăp ntŭk kan, n’gâng kan. Đah nau ntrŭnh mpeh nau sŏk prăk pă nau dơi, Groi Thủ tướng jao ân N’gâng kan ntŭk ntu gŭ âm tâm rgop nsum ma n’gâng kan tơm prăk ƀư jêh nau ntrŭnh tĭng nau dơi, geh nau nkah rnoh tăch bah lam ntur neh gay geh nau dơi ƀư nau kan sŏk joi, tă bah nê sŏk prăk pă nau dơi. Đah ăp ntil khoáng sản ngăn ngên ân geh nkân uănh ri Chính phủ ntrŭnh n’hêl mpeh nau nchâp đă ăp ntil./.