Ăp nar aơ, rnăk nô Đinh Công Nhiên ndrel ma kônh wa tâm ƀon rhơn rek ba tâm lŏ ƀon Klah, xã Ia Mơ, nkuăl Cư Prông, n’gor Gia Lai. Nô Đinh Công Nhiên mbơh, bah rnôk aơ 2 năm, ăp cán bộ ƀư nau kan tuch tăm bah nkuăl, xã hŏ tât ƀon bonh đă ƀon lan ntơn tăm ba dak 2 yan. Kônh wa geh ntĭm ntơm bah nkra neh, srih ba, mât chăm ân tât rnôk rek ba. Yan ba năm aơ, Đinh Công Nhiên nchrăp geh 5 tấn ba, geh rlau 50 rkeh prăk:

  ‘Bah năp nơh ê geh trong mương ri ƀư ba du yan ri nau geh mô âk tâm ban ma 2 yan ôh, ba 2 yan ri geh âk lơn. Năm aơ ri lah năm tal pe, rlau du khay đŏng lah geh rek hôm. Âk năm bah năp nê ri tăm du yan ri geh rnôk mô tŏng phe dông, năm aơ mbơm oi ngăn”.

Tât xã n’har bri Ia Mơ rnôk aơ, nau pah kan, nau rêh bah ƀon lan rgâl ueh ngăn. Rhơn rnôk bah nchrăp geh rek, nô Siu Toàn, ƀon Klah, xã Ia Mơ mbơh, năm aơ, rnăk păng tăm ntơm 3 sào jêng 8 sào, nkre tăm ba ntil ueh ndrel ŭch năm aơ rnăk păng mra geh âk lơn. Nô Siu Toàn, ngơi:

 ‘Bah năp nơh geh mương dak hoch ri ma rnăk hên mô geh tăm ba dak, rnôk aơ ri lŏ geh dak hôm, yor geh ngih dak ntuh kơl nkra ân hoch dak ri ma kônh wa ta aơ đăp mpăn pah kan jan sa, êng săk gâp ri kŏ nsôih pah kan jan sa ân geh piăng sông ao nsoh, răk rong oh kon hăn nti ndrel đăp mpăn nau rêh rnăk vâl”.

 Tâm lŏ ba ƀon Klah, wa Nguyễn Tuấn Anh, Groi Kruanh UBND xã Ia Mơ jur lŏ ntĭm mbơh kônh wa mât chăm ba. Wa Nguyễn Tuấn Anh mbơh, xã rnôk aơ geh rlau 155 ha ba, knŭng tâm 2 năm ma aơ, ƀon Klah geh rlau 100 ha ba 2 yan, rnăk geh nau dơi ri tăm tât 3 yan.

Rnơm ntrơn tăm ba, xã Ia Mơ mơ dơi rklaih nau mô tŏng dơ sa, ƀon lan mơ bah ji ngot. Đah 5 thôn, ƀon, rnoh nŭih rnoi mpôl đê̆ geh tât 70%, ba dak hŏ kơl an khân păng rgâl nau mĭn nau kan tuch tăm, rnăk ach o huch âk bah ăp năm. Wa Nguyễn Tuấn Anh, ngơi:

 ‘Kăl e nơh tâm lŏ bah ƀon klăh knŭng tăm ba du yan ndrel nsing tâm dak mih, kônh wa jêr ngăn mpeh nau hun hao văng sa ndrel ngăn lah tăm ba dak. Rnôk ma trong mương hŏ geh hoch tâm ƀon ri ƀon lan rgâl nau mĭn nau kan bah kônh wa rnoi mpôl đê̆ tâm hun hao văng sa, jut n’huch ach o. Nau aơ tâm di ma nau ntrŭnh rđau mrô 08 bah N’gor uỷ, ntơm bah nê rnoh geh hao tât 9 tấn ba rih/ha. Kônh wa saơ nau săk tam ri ma rêng kan tâm ăp thôn, ƀon, rgâl nau kan tuch tăm ndrel ƀư tĭng nauy kan mhe tâm tuch tăm ndrel rnoh geh ri hao âk ri kônh wa saơ săk tam ngăn”.

Gay ntrŭt dăng nau tăm ba dak tâm nkuăl n’har bri, nkuăl Chư Prông hŏ geh âk nau kơl an. Wa Đinh văn Dũng, Bí thư nkuăl uỷ Chư Prông, mbơh, nkual kơl an kon ntil, phân poh gay bonh đă kônh wa tăm ban ân geh âk, ntĭm mbơh dŏng nau kan tuch tăm mhe nkre têm nkrem, geh geh âk. Ăp nau nsôih aơ leo nsĭt nau dơi âk đŏng:

 “Mbơh ntĭm ân ăp gưl uỷ, ăp gưl ntŭk kan ntrŭnh ƀư lam hvi ngăn, mât tâm dăch ma nau kan tuch tăm bah ƀon lan gay rgâl nau kan mhe, kuăn ty ntĭm nau kan tâm nau tăm ba dak”.

 Đah nau ntrơn rgâl ngăn tâm nau tăm ba dak, nŭih ƀon lan ƀon klăh, xã Ia Mơ hŏ rlet nau jêr, ach o gay ma vơt du nau rêh hơm tăm, đăp mpăn lơn. Ăp lŏ dak dak jêng n’ir mô knŭng lah tơm ndơ sa khlay, ma lah nau rnơm, lah nau saơ bah nau nsôih hao bah kônh wa rnoi mpôl đê̆ nkuăl n’har bri./.