Lah ngoăy tâm âk HTX hăn lor bôk năp rgâl mhe gay ma tâm di đah ntŭk tăch rgâl, HTX tuch tăm dịch vụ Công bằng Ea Tu, nkuăl ƀon têh Buôn Ma Thuột, n’gor Đăk Lak  lĕ dơi geh ăp nău dơi khlăy. Rlău 320 ha cà phê tâm rgop đah ƀon lan kan lŏ mir, HTX dôl ƀư pah kan tĭng nău nchrăp mât chăm tât pĕ lêh, nkret ƀư, nkra njêng cà phê môi, cà phê mpli...geh kơp dơn FLO tâm di đah nău ŭch tăch an dak bah dih. Wa Trần Đình Trọng, Giám đốc HTX an gĭr, ta meng nău kan tât râng ăp nău pah kan tâm rgop, mbơh nău tăch rgâl, HTX lĕ geh dŏng nău dơi tâm nău kan mbơh tơih rnoh mbrô gay ma mbơh tơih, mbơh n’hơ rdâk njêng nău ntơ.

“Mpôl hên săch ăp băl mom, ăp băl aơ lĕ tă gĭt pah kan tâm ăp công ty têh ta nkuăl ƀon têh Hồ Chí Minh mpeh ăp ntŭk tăch rgâl điện tử n’hanh gĭt nău ngơi Anh. Bâh nĕ mpôl hên mbơh tơih ntil ndơ bâh nơm ta ăp trang mạng xã hội n’hanh websize. Mpôl hên geh ăp ntŭk kan tâm dak n’hanh dak bah dih gĭt mpeh Ea Tu cà phê. Bâh nĕ khân păng tât tâm rgop n’hanh rvăt ndơ, gâp mơ n’hao nău geh âk”.

Đah nău dơi lah geh âk nuĭh kan mom, gơih nđơr, nănh mĭn nănh kan, HTX tuch tăm n’hanh pâl nđaih Phú Nông- Buôn Đôn, nkuăl Buôn Đôn, n’gor Đăk Lăk lĕ ngăch rdâk njêng  bản đồ rnoh mbrô tâm rgop ndrel, mbơh tơih ăp  ntil ndơ bâh HTX ta ntŭk pah kan rnoh mbrô. Bâh ăp trang web, kênh youtube, zalo...HTX aơ ăp nar lơ ma geh âk nuĭh gĭt tât. Wa Trần Văn Toàn, kruanh Hội đồng quản trị HTX an lah, aơ lah du trong kan tăch rgâl ueh mhe, way kan n’hanh dăch bên. “Mpôl hên lĕ geh njêng trang web, ăp trang fanpage, rmôt kan ta Zalo, facebok..gay ma bâh nĕ nkoch tay n’hanh trĕ lam mpeh ăp nău mbơh mpeh khoa học kĩ thuật gay ma n’hao nău mĭn pah kan jan sa tâm ban kơt n’hao nău khlăy ntil ndơ. Bâh geh ăp nuĭh kan ndrel tâm ntŭk rêh jêng trĕ lam hvi ăp ntil ndơ n’hanh ăp nău pah kan bâh HTX gay ma nuĭh dŏng ndơ geh knơm dŏng ntil ndơ bâh hên an đăp mpăn ngăn n’hanh ueh lơn”.

Tĭng nău mbơh bâh wa Nguyễn Thiên Văn, groi kruanh UBND n’gor Đăk Lăk, tâm rnôk ntŭk tăch rgâl geh âk nău tâm rlong kơt aƀaơ, ăp HTX lĕ geh na nê̆ mpeh nău dŏng khoa học công nghệ ueh mhe ta nău pah kan jan sa. Âk HTX tuch tăm dŏng công nghệ mhe, ih pâr ndơ tuch tăm đah ntŭk pâr n’hôl duh, ƀư cà phê ueh kah...ăp HTX công nghiệp, tiểu thủ công nghiệp geh âk nău kan rgâl mhe công nghệ, rgâl mhe pah kan- tăch rgâl, dịch vụ bâh kan du ntil jêng kan âk ntil Ndrel đah nău ueh mhe, ăp HTX lĕ ntrôl dăng dŏng công nghệ rnoh mbrô ta nău mbơh tơih, tăch rvăt ntil ndơ ta âk ntŭk tăch rgâl điện tử.

Tâm ba năp nơh, ăp ntŭk kan ta n’gor Đăk Lăk tâm rgop đah ntŭk kan mbơh nău tăch rgâl bâh n’gâng kan công thương lĕ geh ƀư âk jrô nti nău kan mpeh nău dơi tăch rgâl ta rnoh mbrô, hun hao nău ntơ, rdâk njêng rup ueh an doanh nghiệp, HTX ta n’gor. Wa Nguyễn Thiên Văn an gĭt, n’gor mbra geh kơl tay, ntrôl an ăp HTX rgâl mhe rnoh mbrô tâm let năp tay.

 “Aƀaơ dôl geh nău nchrăp kơl aty âk lơn gay ma rdâk njêng ăp HTX ntoh lư mhe. Ta aơ mbra geh nău ueh mpeh âk nău kan tâm nĕ geh dŏng công nghệ mhe, rgâl mhe rnoh brô tâm nău rdâk njêng nău ntơ, nău ntơ ntil ndơ geh ƀư, rdâk njêng rnoh mbrô nkual tăm ndrel đah dŏng rnoh mbrô, dŏng công nghệ mhe kơl an ntil ndơ geh ƀư geh nău ntơ êng ăp nar lơ ma n’hao tâm ban kơt dơi geh nău khlăy nsĭt tay nău geh ueh an nuĭh ƀon lan n’hanh doanh nghiệp”.

Ăp nău nsrôih rgâl mhe rnoh mbrô bâh ăp HTX ta n’gor Đăk Lăk dôl ntop tay nău dơh nơih tâm nău kan mât uănh, kơl bah ir hoach prăk kan, n’hao nău geh an ăp HTX. Ngăn lah, dŏng công nghệ rnoh mbrô ta nău mbơh tơih ntil ndơ dôl pơk luh âk nău nkhêp mhe, ntŭk tăch rgâl mhe, n’hao nău khlăy n’hanh rdâk njêng nău ntơ drăp ndơ bâh Đăk Lăk.