Nsoh ao răm, ndu môp răm, woăn bok răm gay ma mât săk soan rnôk trôk nđik tât 10 độ, yuh Nguyễn Thị Yến, nuĭh kan ta HTX Dịch vụ tuch tăm thôn Ngăm Mạc, xã Lãng Ngâm, nkuăl Gia Bình n’gor Bắc Ninh yơt thung tỏi n’hanh cha lĕ jŭh hăch tĭng di nău ntĭm bâh cán bộ khuyến nông tât tŏ an tơm blân srat, bắp cải bơi di khay dŏng gay ma njrăng bu tuh. Yuh yến an gĭt, rnôk geh ăo cán bộ khuyến nông n’hanh lĕ nuĭh way kan Nhật Bản, yuh saơ biăp play ueh jêng, nău geh âk, tăch khlăy lơn.

"Pah kan tĭng nău mpŏng kan bâh Nhật Bản mô geh jêr. Mpôl hên geh ƀư ăp kĩ thuật, nchih rnoh mbrô, mô puh dak si hóa học ma an geh jŭh cha, tỏi gay ma njrăng bu tuh. ƀư săk tam ngăn".

HTX Dịch vụ tuch tăm thôn Ngăm Mạc, xã Lãng Ngâm, nkuăl Gia Bình n’gor Bắc Ninh lah ngoăy tâm âk hợp tác xã geh ntŭk kan khuyến nông ngih dak n’hanh ntŭk kan tâm kơl lam ntur neh Nhật Bản Jica kơl an gay ma ntĭm nti, nti ƀon lan kan lŏ mir pah kan tuch tăm tĭng trong ueh bâh Nhật Bản n’hanh rgâl nău mĭn geh gĭt đah ntŭk tăch rgâl tĭng trong tăm gay ma tăch, ndơn lah tăch ndơ nơm geh tăm.

Wa Phan Duy Phượng, Giám đốc HTX thôn Ngăm Mạc, xã Lẵng Ngâm, nkuăl Gia Bình n’gor Bắc Ninh an gĭt, gay ma nchrăp an rnoh ndơ geh hao tât 200 tấn cam Canh, bơi tât 300 tấn biăp, bum, play ăp ntil, tâm ton mât đăp mpăn kloh ueh ndơ tĭng nău mpŏng VietGap, geh tem mbơh na nê̆ tu tơm.

"Ta năp lĕ geh tăm biăp dưa cải ăp ntil, bâh ntơm Jica sĭt ta aơ rĭ ƀư na nê̆ lơn, geh săk rnglăy lơn biăp hên ƀư  hao jêng ueh n’hanh mô geh bu tuh, ntŭk tăch ueh, ăp ntŭk dăn rvăt ndơ mô tŏng ma tăch, tết aơ mpôl hên ndơ̆ tŏng rnoh dơm mô geh an rmeh tât ta ntŭk tăch rgâl an geh mât đăp mpăn đah nuĭh dŏng biăp HTX hên lah biăp kloh ueh.

Ta HTX pah kan n’hanh tăch rgâl ndơ tuch tăm kloh Bạch Đằng, thôn Đại Uyên, xã Bạch Đằng, nkuăl têh Kinh Môn n’gor Hải Dương, ăp mir tơm Thanh Long săk gŭr dŭt hvi kơt lah ta Nam Bộ. Thanh Long lah ntil play geh ŭch dŏng gay ma pla ta rơh tết. wa Nguyễn Văn Thuấn, Giám đốc HTX nkret njêng n’hanh tăch rgâl ndơ tuch tăm kloh Bạch Đằng an gĭt, Thanh Long ta ntŭk geh âk nău ueh lor, nău ueh jêng lơn đah play Thanh long tăm ta miền Nam.

"Tăm play rlơ̆ yan dŭt geh, tăch rnoh khlăy lơn. Mbra dơi lah tâm rlong rĭ geh âk nău ueh lơn đah thanh long mpeh Nam. Bâh mpeh Nam tăch ta aơ roh bar pe nar, tâm rnôk nĕ thanh long ta mpeh Bắc an dŭm êng ta tơm, jêng lah kah lơn, tăch dâl ta ntŭk tăch rgâl mpeh miền Bắc jêng nău tâm rlong ueh đŏng”.

Bâh nău uănh nđôi ăp n’gor Bắc Ninh, Hải Dương, Hưng Yên, wa Naoki Kayano, nuĭh way kan JICA rnê âk nău tât râng âk bâh ƀon lan kan lŏ mir, ăp HTX n’hanh ngăn lah nău hăn ndrel bâh lĕ trong kan khuyến nông. Păng an lah, rơh tết aơ mbra lah rnôk ma nău ŭch ta ntŭk tăch rgâl hao âk n’hanh lah rơh tăch ndơ tuch tăm geh âk bâh ƀon lan kan lŏ mir. Nuĭh pah kan mô kâp ma geh gĭt ăp nău ŭch n’hanh nău geh ta ntŭk tăch rgâl bâh ăp nău kan mbơh tơih nău mhe. JICA mbra pah kan tay đah ntŭk kan Khuyến nông ngih dak n’hanh ăp ntŭk kan khuyến nông n’gor gay ma ƀư ăp nău kan geh tât kơt lah tâm rgop, tâm nchră mô lah tâm mâp kan gay ma ntrôl n’hanh hun hao tay lơn nău kan tuch tăm ta Việt Nam.

Tĭng nău mbơh bâh Giám đốc ntŭk kan Khuyến nông ngih dak Lê Quốc Thanh, bâh ăp nău geh dơi rơh bôk năp, tâm let năp tay, ntŭk kan khuyến nông ngih dak n’hanh ntŭk kan JICA an geh pơk hvi tay trong kan aơ an ăp HTX n’hanh ƀon lan kan lŏ mir.

“Tât atay mpôl hên mbra geh săch tay 50HTX tay n’hanh rgâl njêng nkual aơ bâh he an geh pơk kan mbro jêng nkual pah kan jan sa an đăp mpăn. N’hanh ntil ndơ bâh he mô dơn tĭng rơh, rơh ma he mbra geh, ndơ tuch tăm đăp mpăn tâm lĕ năm”.

Tết lah rơh geh dŏng âk ntil ndơ tuch tăm biăp bum, ndơ sa hao âk, ngăn lah ăp ntil biăp bum play kloh, đăp mpăn tĭng nău mpŏng bâh Nhật Bản mbra geh ntŭk tăch rvăt dơn âk. Ăp HTX tuch tăm an gĭt mbra nsrôih mât tâm nău pah kan jan sa tuch tăm kloh ueh ăp năm gay ma pă an nuĭh dŏng ndơ mô dơn lah ta rơh tết atay.