Jêh rlău du năm sầu riêng dơi tăch n’gluh trong têh an ntŭk tăch Trung Quốc, ƀon lan Dak Lak dŭt rhơn rnôk năm 2023 dơi geh, tăch khlay, nsĭt tay săk rnglăy wăng sa âk. Bah aơ, âk nuĭh ƀon lan mât nău mpŏng ƀư ndrŏng bah tơm play aơ. Dŭt năm e, wa Bùi Quang Tuân ta nkuăl têh Phươcs An, nkuăl Krông Pắk lĕ mô rvê an phah jăng 7 sào cà phê rgâl an tăm sầu riêng.

Aƀaơ dôl rgâl tăm bah cà phê an tăm sầu riêng. Yor tơm aơ lĕ dơi tăch n’gluh trong têh jêng mbra nsĭt tay săk rnglăy wăng sa âk lơn.

Bôl ăp nău đă bah nău kan dơi kan, âk ƀon lan ta Dak Lak dôl phah ăp tơm tăm way ơm gay tăm sầu riêng tâm yan mih aơ. Wa Trần Xuân Quyền, Kruanh UBND xă Ea Tar, nkuăl Cư M’gar an gĭt, tĭng dăp rgum, tât năm 2025, rnoh neh tăm tơm sa play bah xă nklăp 500ha, dŭt âk lah tăm sầu riêng. Yơn lah, tât rnôk aơ rnoh neh lĕ rlău dăp rgum.

Tâm ăp năm bah năp, rnoh neh tơm sa play bah xă, lơn lah rnoh neh sầu riêng hao dŭt âk. Bah 500ha aƀaơ geh bơi 800ha, tâm nĕ bơi 500ha sầu riêng lĕ play. Hôm rnoh neh tăm srah tâm ăp mir cà phê, tiêu n’hanh ăp ntil tơm êng.

Tĭng rnoh kơp mhe ngăn bah Ntŭk kan kơp uănh Dak Lak, tât khay 6/2024, lam n’gor geh bơi 33.000ha sầu riêng, hao bơi 10.000 ha nkôp đah năm 2022. Đah rnoh neh aơ, rnoh geh n’hanh rnoh sầu riêng lĕ rlău dăp rgum n’gluh an n’hanh dôl hao tay. Yơn lah đah trong rgâl jêt chrai, mô rgum mbra jêng tât nău mô tâm ban mât uănh uĕh jêng, ndơ jêr an tâm di ăp nău đă tăch n’gluh, khuch tât rnoh khlay nău kan ndơ dôl geh aƀaơ. Wa Nguyễn Hắc Hiển, Chi cục trưởng Chi cục tuch tăm n’hanh dak si mpa rong tơm tăm n’gor Dak Lak rvê.

Mã nkual tăm ntrŭnh dŭt âk 10ha, mât tăm tĭng trong kơp dơn n’hanh an geh nău tâm rgop, an djôt dơn ký rnăk ƀon lan. Dăp rgum he jêt, rnoh neh chah chrai, ma lŏ chah chrai tay gay dơi geh tăch n’gluh ri dŭt jêr. Nâp nâl nkual tăm chah chrai ri kơt dŏng tâm ban khoa học kỹ thuật jêr đŏng. Bah nău uănh nđôi srê, nău mât uănh uĕh kah, nău dŏng dak si tâm lŏ mir n’hanh n’ăp nău peh dŭt jêr jŏt đŏng. Tĭng wa Đặng Bá Đàn, Kruanh văn phòng Ntŭk ntrŭt nsôr pah kan Nam Trung Bộ n’hanh Tây Nguyên mpeh tâm N’gâng kan tuch tăm mât rong n’hanh hun hao ƀon lan, nău rgâl an tăm sầu riêng du trong mô mĭn, mô uănh nđôi, mô tĭng trong bah ăp ngih pah kan way kan kơt aƀaơ mbra n’glơi an âk nău mâp. Mô hŏ kơp, rlău ma Việt Nam, sầu riêng lăp ntŭk tăch Trung Quốc aƀaơ hôm e geh âk nkual lŏ mir tâm rlong hô lah Thái Lan, Philippines.... Mpeh hun hao nău kan ndơ sầu riêng, wa Đặng Bá Đàn an lah:

An tĭng trong tăm, đăp mpăn uĕh kah, tĭng trong hữu cơ vi sinh, geh tâm di tĭng mã nkual tăm, ăp nău nkret njêng jru. Lơn lah nău ƀư an tâm rgop đah ăp doanh nghiệp tăch n’gluh, doanh nghiệp nkret njêng n’hanh nuĭh tăm.

Tĭng N’gâng kan Tuch tăm mât rong n’hanh Hun hao ƀon lan, năm 2023, Việt Nam tăch n’gluh rlău 600.000 tấn sầu riêng, nsĭt geh prăk 2,2 rmen đôlar. Yơn lah, nău hao tăch n’gluh dôl hao pơk hvi rnoh neh, phah dăp rgum ta lam hvi. Đăp mpăn uĕh kah sầu riêng tăch n’gluh an nău kan bôk năp aƀaơ gay sầu riềng Việt Nam dâk nâp ta ntŭk tăch lam ntŭr neh, ngăn lah ta ntŭk tăch Trung Quốc, bah năp nău mpeh tâm rlong nar lơ hô bah Thái Lan, Malaysia... tĭng nĕ nău hao jêng “ndal” mpeh rnoh neh sầu riêng ta âk n’gor n’hanh lam dak tâm năm bah năp, ăp ngih pah kan mpeh tâm N’gâng kan tuch tăm mât rong n’hanh Hun hao ƀon lan an tâm rgop đah ăp ntŭk kơp uănh tay ăp nkual tăm sầu riêng uănh ăp ntŭk tâm di an hun hao tay tơm tăm aơ, kơp uănh tay lĕ rngôch trong tăm sầu riêng.