Ƀư tĭng ntĭm rđău bah Chính phủ, UBND n’gor Kon Tum dôl mbơh ƀư nău rgâl rlău 73 ha neh bri an rgâl nău ŭch êng gay ndâk ƀư trong hăn, dak bât. Tĭng nĕ, UBND n’gor Kon Tum đă ăp n’gâng kan, nău kan dơi kan uănh nđôi, kơp tay gay đăp mpăn tâm ban ŭch mpeh rnoh mrô, ntŭk đah sam ƀŭt rhăch nău n’hanh neh ntu ta ntŭk; mpeh nău bri n’hanh ntil bri.

Ndrel đah nĕ ndâk nkra sam ƀŭt rhăch nău, mbơh an gưl dơi mkra nău, uănh an sam ƀŭt rhăch nău tăm bri rgâl n’hanh dŏng bri ta rnoh neh bri rgâl nău ŭch dŏng an nău dŏng êng. UBND n’gor Kon Tum đă ăp n’gâng kan nău kan, dơi kan tâm ôp tâm nchră gưl dơi mkra uănh mĭn tay rgâl nău ŭch dŏng bri rnôk tâm di tŏng ăp nău dơi ntrŭnh bah Luật Lâm nghiệp n’hanh ăp nău ntrŭnh bah pháp luật geh tât; geh trong trok, sŏk neh, đăp mpăn mbơh tơih rah wah; nău ƀư tĭng nău nchrăp ƀư mô ƀư roh hoach drăp ndơ ngih dak, mô an geh nău phong; khuch tât nău lư, rnă njrăng đăp mpăn n’hanh nău rêh nuĭh ƀon lan.