Me deh tâm ƀon tơm cách mạng Ia Hrung, huyện Ia Grai, n’gor Gia Lai, Ksor Phiếu gŭ ur knŭng geh bar mpang ty dơm. Rnơm gơih nau lă kan, blau têm ri ma nau văng sa bah rnăk vâl lơn nar lơn geh. Rôk aơ Ksor Phiếu lah ngoai tâm ăp rnăk geh nau kan văng sa rjăp ngăn tâm ƀon, đah bơi tât 2 ha cà phê tăm nsum ma tiêu ndrel rong geh 7 mlâm ndrôk. Năm mhe rlau, cà phê khlay, rnăk vâl păng geh rlau 400 rkeh đŏng.

Âk rnăk tâm ƀon hŏ kơt tĭng nau kan tăm tơm jŏ năm ndrel rong ndrôk bah Kruanh thôn Ksor Phiếu ma nau văng sa kŏ jêng geh đŏng. Rnôk aơ 200 rnăk tâm ƀon, ăp ngih kŏ geh tivi, ndeh hon-đa. Âk rnăk vâl hŏ geh ndâk ngih nâp. Kônh wa tâm ƀin geh nau rêh đăp mpăn. Yơn trong hăn ro ri ê geh ueh nơih. Năm 2023, kruanh thôn Ksor Phiếu mĭn trong lah rnơm rmôt kan tâm njêng bah ƀon lah Công ty cà phê Ia Grai ndrel ăp rnăk ƀư nau kan tăch rgâl tâm nkuăl kơl an prăk ndrel ƀư trong mpoh ang ƀon lan. Rnơm nê ma ăp măng nau hăn ro trong ƀon bah ƀon lan tâm bri măng geh nơih lơh. Wa Ksor Tí, nŭih ƀon Blo Dung ngơi: 

“Ntơm rnôk wa Ksor Phiếu geh săch ƀư Bí Thư Chi bộ nkre Kruanh thôn, păng ƀư âk tŏ rƀŭn nchră bay ma nkoch trêng ân kônh wa, ngăn lah druh ndăm mô dơi ƀĭt ndeh lah geh tă ngêt ndrănh ƀiêr, bonh đă kônh wa mô ân geh tâm gŭ ur sai ơm. Hôm tâm nau hun hao văng sa jêh jêng ngăn lah tăm ba dak, rnôk aơ đah nau tăm cà phê ri tâm du yan geh ntơm 5-6 tấn rnglay đŏng, Đah bôk nau kan mpoh ang trong ƀon, tâm ăp nar rlau rmôt kan tâm njêng kŏ geh kơl an ndrel rnglăp 5 pil mặt nar gay ma mpoh ang trong ƀon’.

Tâm ăp khay, Kruanh thôn Ksor Phiếu rƀŭn ƀon kan gay tâm nchră ăp nau jêr nkol tâm nau rêh. Tâm ăp rơh rƀŭn êp aơ, Ksor Phiếu kŏ sŏng mbơh nkoch ăp nau kan bah du đê̆ nŭih mom ndăm hôm ƀư tih Luật hăn trong. Păng ndrel ma du đê̆ nŭih tâm rmôt mât njrăng êng bah ƀon Blo Dung tât ăp ngih gay ma đă ký ton nau đăp mpăn mô tih luật hăn trong, Thiếu tá Vũ Hùng Cường, Kruanh Công an xã Ia Hrung mbơh:

“Rmôt kan công an đah ăp nŭih kan bah thôn ƀon, ngăn lah đồng chí Ksor Phiếu gơih ngăn tâm nau kan aơ, đă ăp rnăk ân geh ton nau ntĭm mbơh pháp luật tât ăp kon se ri ăp kon se hŏ ƀư tĭng ueh đŏng. Ngăn lah, me mbơ̆ hŏ geh nau nchrăp leo ăp kon se hăn nti tât ngih săm ƀŭt, mô ân kon se ncho êng ndeh rnôk hăn nti”.

Kruanh thôn Ksor Phiếu hôm râng ăp nau kan kơl rjaih ăp nau tâm rkeh tâm ƀon lan. Bonh đă kônh wa nsôih njrăng, rdâng ma ăp phung tih dôih, jut jăng lơi nau tâm gŭ ur sai ơm, njrăng rdâng ma ăp phung tih dôih; jut jăng lơi nau tâm gŭ gŭ ur sai ơm, êp dak mham gay ndâk njêng nau rêh văn hóa tâm ƀon. Wa Phiếu nkoch lah: lah du hê đảng viên, lah kruanh thôn ri ma moh nau kan kŏ ân geh leo trong lorm kônh wa mơ kơt tĭng:

“Gâp ntĭm đă druh ndăm ncho ndeh an geh kơt tĭng luật hăn trong kơt ndâu môk n’gang bôk, mô dơi ngêt ndrănh ƀiêr rnôk ƀĭt ndeh. Ân tŏng năm mơ dơi guư ur sai, jut jăng lơi ăp nau vay rlu mâl ơm ndrel bonh đă ăp kon se ân geh hăn nti da dê. Ntop tay du nau kan khlay đŏng lah êp aơ vay geh kon se rmok dak tâm âk nkuăl, ri ma gâp kŏ vay nkah kônh wa ƀon lan uănh njrăng ân oh kon nơm âk lơn gay ma der ăp nau tât mô ueh kơt nê”.

Wa Thái Hồng Cương, Bí thư Đảng ủy xã Ia Hrung ân lah: Ăp nau tă dơi geh bah nau hun hao văng sa, rêh jêng tâm ƀon Blo Dung geh âk nau rgâl lah nau rgop dŭt têh bah Ksor Phiếu:

“Đah đồng chí Ksor Phiếu đah nau ƀư Bí thư nkre Kruanh Thôn ri  păng kŏ vay ƀư ueh ntrŭnh ăp nkô̆ nau kan bah Đảng, pháp luật bah Ngih dak năn tât đah kônh wa. Bah ăp nar rƀŭn rgum chi bộ, rƀŭn nsum ma ăp thôn, ƀon ri păng bonh đă ƀon lan jut lơi ăp nau rluk mâl ơm. Tât rnôk aơ, nau kan hun hao văng sa ndrel đăp mpăn rnă njrăng chính trị tâm thôn mro geh nâp nâl”.

Ksor Phiếu mro geh ƀon an tâm ƀon Blo Dung, xã Ia Hrung, huyện Ia Grai, n’gor Gia Lai rnơm ndrel ŭch rŏng./.