Rnâng kan mât uănh bri njrăng Thạch Nham geh n’gor Kon Tum mât uănh 32 rbăn ha bri rgŏ jong hvi ta lam 5 xã bâh nkuăl Kon Plông dăch n’har đah ăp nkuăl Sơn Hà, Sơn Tây, Ba Tơ, n’gor Quảng Ngãi n’hanh nkuăl Nam Trà My, n’gor Quảng Nam. Ta nkual neh bri hvi nkre lah dăch n’har đah 2 n’gor jong tât rlău 50km jêng nău kan mât uănh bri hôm nha geh mâp âk nău jêr. Wa Phan Quốc Vũ, kruanh rnâng kan mât uănh bri mât njrăng Thạch Nham , an gĭt nău tâm rgop na nê̆ đah ăp ntŭk tơm mât bro ta Quảng Ngãi n’hanh Quảng Nam lah trong kan dŭt ueh gay ma mât bri săk rnglăy.

 “Ntŭk kan mbơh tơih nău nchrăp kan tâm rgop đah ăp ntŭk tơm mât bri băl n’hanh ƀa ƀơ ăp tơ̆ geh nău nchrăp kan uănh nđôi, uănh năl. Đah bar ding lĕ geh ƀa ƀơ tâm ôp tâm mbơh n’hanh leo ƀư ăp rơh rdul uănh ta nkual dăch n’har. Bâh nău tâm rgop đah ăp ntŭk kan dăch n’har rĭ rnoh neh geh rnâng kan mât uănh lah dŭt ueh”.

 Ăp ntôr bri dăch n’har đah nkuăl Ia H’Drai, n’gor Kon Tum đah 2 nkuăl Ia Grai n’hanh Chư Păh, n’gor Gia Lai tă lah ntŭk geh kăl si sŏk đar dŭt âk n’hanh muĭh kăl su bri ƀư mir. Ngăn lah ta nkual dak bât pă điện Sê San 3A n’hanh Sê San 4, nuĭh muĭh kăl bri nde ma trong dak me nchoăn rdeng si, đar, ăp tơ̆ rnôk mpeh đah Kon Tum rdul joi hŏ nchoăt let n’gor Gia Lai n’hanh rlơ̆ tay. Bâh năm 2018, rnôk ma nău nchrăp kan tâm rgop tâm nău kan mât uănh, mât bri n’hanh mât ăp ntil si đar ta nkual dăch n’har đah 2 n’gor Kon Tum n’hanh Gia Lai geh tâm ton kan, ăp mpôl kan 2 ding ndrel tât râng tâm rgop na nê̆, mât bri jêng nău ƀư tih lĕ hŭch âk. Wa Nguyễn Tiến Dũng, groi kruanh UBND nkuăl Ia H’Drai an gĭt.

 “Nău kan tâm mbơh nău tâm ban kơt tâm rgop ƀư uănh nđôi rdul joi ta nkual dăch n’har đah ăp mpôl kan têh đah 2 nkuăl bâh n’gor Gia Lai lĕ geh uănh khlăy gay ma bah ir geh nău rŭn in tât si gle ndơ ta bri lĕ geh n’hao săk rnglăy ueh. Bâh ăp năm nău ƀu tih lĕ hŭch âk. Tât aƀaơ ta nkual dăch n’har bâh nkuăl đah ăp nkuăl bâh n’gor Gia Lai lah na nê̆ lah mô hôm geh nău duh jêr mpeh nău ƀư tih Luật mât bri”.

N’gor Kon Tum geh n’har bri dăch đah ăp n’gor Quảng Nam, Quảng Ngãi, Gia Lai lĕ nău jong bri rlău 440km. Ƀư tĭng nău nchrăp tâm rgop, 5 năm ba năp rnoh kan mât bri ăp n’gor lĕ geh ƀư rbăn rơh uănh nđôi ta nkual dăch n’har. Bâh nĕ geh saơ 370 nău ƀư tih pháp luật tâm trong mât bri, rmal đah hình sự rlău 30 rơh, nhup kân bơi tât 1 rbăn mét khối si ăp ntil...Wa Nguyễn Văn Nam, Kruanh Chi cục kiểm lâm n’gor Kon Tum an gĭt, nău kan tâm rgop mât bri ta nkual dăch n’har ăp nar lơ ma na nê̆, săk rnglăy.

 “Ntŭk kan tơm bri ta nkual dăch n’har bri tâm nău pah kan tâm rgop mât uănh mât bri đăp mpăn na nê̆. Ƀa ƀơ uănh nđôi mbơh nău mhe, geh trong kan tâm rgop ƀư tĭng ueh nău kan mât uănh bri ta ăp nkual dăch n’har tĭng ntŭk kan geh pă mât uănh. Njrăng ngăch ndal nău run in muĭh kăl bri, rŭn in neh bri, sŏk dŏng tăch rvăt nchoăn rdeng si đar mô tâm di pháp luật ngăn lah ăp rơh dăch nar lễ tết”.

N’gor Kon Tum aƀaơ geh rlău 616 rbăn ha bri, tâm nĕ lĕ rngôch lah bri ơm geh, nău nkŭm n’hâm bri bâh n’gor rlău 63% dŭt âk ta Tây Nguyên. N’gor hôm nha geh âk rnoh neh bri hon êng đah rnoh si têh âk, âk ntil si, âk ntil mpô mpa bri khlăy. Bâh gheh leo kan, nsrôih tâm rgop đah ăp mpôl kan têh n’hanh ăp n’gor dăch n’har đah Kon Tum dôl geh mât mău nđir an ăp ntôr bri, mât ueh ntŭk gŭ rêh ta năp ăp nar lơ ma jêr njrăng, tâm ban kơt lah mât nău rêh pah kan jan sa an ăp nuĭh rnoi đê̆ ta ntŭk.