Aƀaơ ăp nuĭh dăn rvăt sầu riêng ta mir ta Đăk Lăk đah rnoh bâh 80 rbăn tât 95 rbăn prăk.kg, lah nău dŭt ueh ta ntŭk tăch rgâl. Yơn lah, nău mbơh rnoh khlăy, dăn rvăt đah rnoh khlăy mbra geh mô ueh tât ƀư tih rnoh rvăt nsum, nklơi nchăm lor prăk, tih nău tâm ton mbra geh âk lah nău ngăn ta ntŭk tăch rgâl geh nău rgâl têh. Ta meng nĕ, nău tâm pit rvăt, nchâp rvăt, ntung, ƀư khuch tơm kơt ntơm nơh geh âk, ƀư an ƀon lan mât tăm jêr. Wa Y Khoan Kbuôr ta xã Cư Pơng, nkuăl Krông Búk, n’gor Đăk Lăk an gĭt.

“ Aƀaơ nău rêh đăp mpăn, sầu riêng dôl geh rnoh khlăy, nău wăng sa ta rnăk vâl hun hao. Gâp saơ tâm ƀon lan geh ăp nuĭh mom lah dŭt nsrôih ngăn tâm nău mât chăm play sầu riêng”.

Gay ma mât đăp mpăn rnă njrăng tâm khay lêh sầu riêng, n’gâng kan ta ntŭk lĕ ndrel đah mpôl kan công an ăp ntŭk ta n’gor Đak Lăk lĕ geh rdâk njêng, mbơh tơih nău kan n’hao njrăng rdâng nău tih n’hanh ăp nău ƀư tih tâm yan sầu riêng năm 2024.

Nkre lah uănh nđôi ta ntŭk mât sầu riêng, uănh nđôi ta ăp ntŭk geh tăm âk, ngăn lah ta ăp mir sầu riêng ngai đah jay ƀon lan, uănh nđôi ăp nău pah kan rvăt, tăch sầu riêng, njêng rmôt kan kơl lêh play n’hanh tăch rvăt sầu riêng. Đại tá Trần Quang Hiếu, Groi giám đốc công an n’gor Đăk Lăk an gĭt.

“Mpôl hên mbra gĭt njrăng lor ăp nău, tâm rgop đah ăp n’gâng kan n’hao nău mât uănh ngih dak mpeh mât đăp mpăn wăng sa, ngăn lah geh tât rnoh mbrô nkual tăm rnoh mbrô tâl dŭng n’hanh ăp nău kan njrăng tăch rlăm. N’hanh ngăch geh saơ nău tât gay ma rmal njrăng răng dăng ăp nău ntung tih. N’hao nău mât uănh ngih dak mpeh pah kan tăch rvăt nglăp, mât ŭanh mpeh ntung trong, mpeh nău mât uănh nău kan tăch rgâl geh nău dơi gay ma mât đăp mpăn ta ntŭk”.

N’gor Đăk Lăk aƀaơ geh rlău 32.700ha sầu riêng, tâm nĕ geh klâp ma 16 rbăn ha an nău geh lêh play, lah n’gor geh rnoh neh sầu riêng dŭt têh ta lam dak. Năm 2023, sầu riêng ta Đăk Lăk geh rnoh 285 rbăn tấn n’hanh năm aơ mbra geh rlău 300 rbăn tấn.