Ăp rnăk tăm sầu riêng ta xã Krông Pắc, n’gor Đăk Lăk an gĭt nău pah kan tăch rvăt dôl geh rgâl bâh tâm rlong kan êng jêng tâm rgop tĭng nău kan mhe, an lor ta ăp nkual tăm geh rnoh mbrô, mât njrăng nău ueh kah bâh ntơm rvăt bôk năp.

Wa Mai Hữu Sơn, ndơn kan an doanh nghiệp way geh rvăt sầu riêng tăch an dak bah dih an gĭt, rnôk ma doanh nghiệp n’hanh ƀon lan ndrel kơl kan tâm rnôk pah kan, nău tâm di đah nău mpŏng kan bâh ntŭk tăch rgâl rvăt nglăp mbra dơh lơn, nkre lah njêng nău mhe an nău tâm rgop kan jŏ jong, bah ir geh nău tât tâm rnôk rvăt tăch. "Doanh nghiệp lĕ dâk leo tâm rgop đah nuĭh ƀon lan ta 4-5 rnoh mbrô nkual tăm. Ăp rnoh mbrô aơ bâh geh rmôt kan ndrel, nuĭh ƀon lan dơn mât uănh, doanh nghiệp kanŭng geh tâm rgop tăch rvăt ndơ geh ƀư. Nău khlăy ngăn lah nău knơm, doanh nghiệp pah kan geh nău knơm rĭ ƀon lan mbra geh nău knơm n’hanh hăn ndrel.

Mpeh đah Hiệp hội sầu riêng, wa Lê Anh Trung, Kruanh Hiệp hội sầu riêng Đăk Lăk uănh năl, nău mbrơi tay bâh ntŭk tăch rgâl ta năp yan klêh play lah nău ueh. Rnôk ma doanh nghiệp mô hôm tâm pit hăn rvăt lor bâh ơm, ăp nău tât bâh nău nkrem ndơ tăch, n’huch thuk rnoh tâm rlong rvăt, tâm pit tăch lĕ geh dơi njrăng. “Nău dăn rvăt lor ta mir ơm kơt bâh ntơm nơh geh âk ngăn nău tât mô dơi njrăng. Lah rnoh khlăy jur thuk, bar ding dơh ngăn geh nău tâm rkeh jêng tât mô hôm tâm rgop kan tay. Yor nĕ, nău rdâk njêng ăp ntŭk tâm rgop kan mbra kơl an ăp doanh nghiệp rvăt tăch geh nău knơm, mât đăp mpăn tâm di đah nău ŭch dăn rvăt ndơ geh ƀư”.

Ăp nău rgâl ndal aơ geh bâh nău lăp kan bâh ntơm bôk yan bâh n’gâng kan ta ntŭk. Wa Lại Đình Đại, Kruanh UBND xã Krông Păc, n’gor Đăk Lăk an gĭt xã lĕ geh njêng rnâng kan mât pă n’hanh rmôt kan uănh nđôi, tâm rgop đah ăp n’gâng kan geh blău kan, Hiệp hội sầu riêng n’hanh ăp ntŭk kan uănh năl ntĭm mbơh đah ƀon lan pah kan di đah nău way kan, uănh năl bâh nău dŏng ndơ mât tơm tăm, sŏk ntil ndơ uănh năl rmeh Cadimi n’hanh dak si mât tơm tăm, nkre lah mât uănh na nê rnoh mrô nkual tăm.

Ta ntŭk lĕ geh leo kan tâm rgop đah doanh nghiệp tăch rvăt, tăch an dak bah dih bâh ntơm bôk yan gay ma geh gĭt đah nău ŭch ntŭk tăch rgâl. Nchrăp lor ta dŭt khay 7, xã mbra geh leo ƀư rơh tăch ndơ đah rnoh bôk năp rlău 14,5ha sầu riêng geh rnoh mbrô nkual tăm, rnoh geh klâp ma 300 tấn đah nău tât râng kan bâh âk doanh nghiệp. wa Lại Đình Đại an gĭt tay. "Năm aơ ndơ̆ an lăp dŏng tĭng nău mât đăp mpăn tĭng nău way geh pă an dŏng rĭ mơ dơi geh rvăt tăch n’hanh ăp ntŭk geh rvăt tăch kơt nĕ đŏng, mơh ntŭk I dơi geh an rvăt ndơ rĭ dơi rvăt. Nău tal 2 đŏng lah ăp ntŭk mât prăp an geh mât đăp mpăn  mpeh kĩ thuật, mât đăp mpăn mpeh kloh ueh ndơ sông sa. Tal 3 đŏng lah an geh nău mât uănh pă kan bâh ta ntŭk rĭ mơ dơi pah kan. Mbrơi mbrơi mbra ndơ̆ leo êng nău rvăt sầu riêng ta ntŭk lăp tĭng ta nău way ơm geh ueh di lơn”.

Đắk Lắk aƀaơ geh klâp ma 44 rbăn ha sầu riêng, tâm nĕ geh rlău 33 rbăn ha dôl ntơm klêh play, rnoh geh năm 2026 nchroh mbra lah 500 rbăn tấn. Lôch âk năm tâm rdang đah nău rvăt êng, tăch êng, tâm rlong tăch tâm pit rvăt n’hanh ƀư khuch nău tâm rgop kan ndrel, ntŭk tăch rgâl sầu riêng Đăk Lăk lĕ geh njoat njêng tay nău kan. Rnôk ma n’gâng kan mât na nê̆ nău kan, doanh nghiệp rdâk njêng nău tâm rgop kan nâp nâl n’hanh ƀon lan ƀư tĭngnău pah kan mât uănh, n’gângkan sầu riêng dôl geh tay nău kan gay ma hun hao đăp mpăn, tâm di ueh lơn nău ŭch bâh ntŭk tăch rgâl an dak bah dih tâm let năp tay.

Hương Lý/VOV Tây Nguyên