Đah rnoh neh rlau 720 rbăn ha, tâm nê geh nklăp 95% lah Robusta, Việt Nam rnôk aơ lah ngoai tâm ăp neh dak ê nkra ndrel tăch luh cà phê Robusta âk ngăn lah ntur neh, geh nklăp 40% rnoh geh bah lam ntur neh. Tăm cà phê Robusta âk njêng nau kơl an tâm nau rêh jêng âk ngăn ân ma rbăn rnăk ƀon kan, ngăn lah tâm nkuăl Tây Nguyên.

Yơn lah, ntŭk kan Robusta dôl rdâng đah âk nau ntul rlong. Rnôk aơ rlau 70% rnăk ƀon lan dŏng phân hóa học rlet ma nau dơi, ƀư âk nau geh dŏng prăk tuch tăm, n’huch nau nâp kah ndrel khuch ngăn tât săk tam bah nau kan. Tâm rnôk nê, nau kan klih play ndrih hôm âk. Nau geh mĭn njêng bah ntŭk kan Khoa học Kỹ thuật Lâm nghiệp Tây Nguyên ân saơ, nau kan klih play rih huch geh 22% rnoh grăp rnglay, nkre ƀư n’hao lơn tay rnoh prăk nsiăp, khuch ngăn tât nau geh ndrel rnoh nơm tăch.

Tâm rnôk tâm nchră, ăp ntoh măt kŏ ân saơ, tâm rnôk lam ntur neh nar lơn ma ndơ̆ luh âk nkô̆ nau jêr lơn mpeh rnoh nâp, hun hao nâp nâl, joi tu tơm nkuăl tăm ndrel rnoh geh rmeh bah dak si tâ tơm tăm, nau kan n’hao rnoh nâp bah Robusta ân geh ntơm bah nkuăl tăm, ntil kon tăm, nkre ndâk dŏng nau kan tăm mât chăm ân khoa học, tâm di nau rnoh dŭm, ê nkra tĭng nau dơi, nkra ndâk nau kan tâm rnglăp nâp nâl đah nŭh kan lŏ mir, tâm boh kan nsum ndrel ntŭk kan tăch rgâl. Tâm nê, ân geh uănh năl koh nau dơi bah ăp tơm ê kra, rvăt, ê nkra nâp ân tât rnôk tăch gay nkân nâp rnoh kah ueh n’hao lơn tay nau dăng ndrel nau dơi n’hâm ntul rlong bah cà phê Robusta Việt Nam tâm lam ntur neh. Wa Thái Như Hiệp, Groi Kruanh rmôt Cà phê-Ca cao Việt Nam, ân lah:

‘Ŭch n’hao lơn tay nau nâp kah bah cà phê Robusta Việt Nam ri nơm ân geh ntơm bah rnôk săch kon ntil, neh, dak, mih nar, nau ơm yau ndrel ăp dĭng lĕ ndoh ndơ mât chăm ân rnôk ntơm ƀư ân tĭng dơi bah geh bah ntil kon ma nơm leo tăm.

Yơn lah, nau tăm mhe knŭng lah n’gul dơm nau kan, nau nâp knŭng jêng rnoh geh tăch rgâl rnôk nau kan tăch rgâl ân năl kloh nau đă, ntŭk ƀư geh tăch, nau veh ƀư ân rah vah ndrel rnoh geh tâm di ma nŭih ƀon lan”.

Ntơm bah nau geh dơi lah dak leo tơm bah lam ntur neh ndrel rnoh tăch luh cà phê Robustak Việt Nam dôl dâk bah năp nau đă ân geh ntơm rgâl ntơm bah rnoh nâp jêng nau n’hao lơn tay nau nâp nâl ndrel rnoh geh ê nkra, ma hôm ŭch geh nau tâm rgop đah nŭih kan lŏ mir, ntŭk tâm boh nau kan, rmôt kan ndrel ăp nŭih mât kan. Bah nê, Robusta Việt Nam mra geh tay nau dơi gay lah rjăp nau dăng săk nto, n’hao n’hâm ntul rlong ndrel hun hao nâp nâl tâm ntŭk tăch bah lam ntur neh./.