Bol ma Cục Thú y ntơm n’glôch jêh hang rbăn mblâm ndrôk dak toh ta n’gor Lâm Đồng hŏ ntưp ji jru n’hanh hang rhiăng mblâm khĭt, lah tă bah ntưp kaman geh tâm vaccine NAVET-LPVAC njrăng n’gang nău ji pŭn ntô bah Công ty Navetco. Yơn lah, nău ma kônh wa dôl dŭt kâp nơm lah nău trok tâm, nău ntop kơl bah Navetco mbra mhâm dơi mĭn uănh, rnôk prăk săm an ndrôk roh huach tĭng nar đŏng, păt kroh mbrơi wăng sa bah ăp rnăk mât ma rnoh ndrôk khĭt mô hŏ dơi rlu bah.

Rlău ma 3 mblâm ndrôk khĭt, 29 mblâm ndrôk dak toh hôm ƀa ƀă bah rnăk wa Nguyễn Thanh Phong, thôn wăng sa mhe, xã Tu Tra, nkuâl Đơn Dương, n’gor Lâm Đồng dôl  tâm nău ji ndŭl djroh, djôr rgay, ât sa da dê, tâm nê geh du đêt mbra khĭt moh rnôk. Rlău 10 nar aơ rnăk hŏ roh dŭt âk prăk rvăt dak si săm yơn mô saơ tam bah. Wa Phong an gĭt, gay mât rơ̆ ndrôk mpôl dja rnăk hŏ rgum ntêr tơm prăk bah âk năm, manh tay ngân hàng 3 rmen prăk. Aƀaơ ndrôk hŏ khĭt n’gul tă bah ji chuh vaccine, mô dơi păt dak toh, jêng wăng sa rnăk wâl geh hŭch hô:

“Ndrôk 32 mblâm ma khĭt 3 mblâm hŏ tâp, 3 mblâm êng ri dôl păm kơt aơ. Aƀaơ ndrôk plơ̆ ji tay, ât sa, ji ndŭl djroh 5- 6 mblâm đŏng. Gâp dŭt ji uh nuih n’hâm ngăn, gâp mô geh prăk ngăn, dơn manh tơm prăk ngân hàng dơm n’hanh rƀŭn rgum ntêr ntop an ta aơ. Aƀaơ tŭp tâm nô nău dja mô gĭt jêh aơ tay mhâm rêh đŏng ôh. Mpŏng ăp gưl n’gâng kan mĭn uănh khuch khat roh huach bah kônh wa gay ntop kơl”.

Tâm ban kơt nê đŏng, wa Huỳnh Thị Kim Phượng, ta thôn Lạc Nghiệp, xã Tu Tra, nkuâl Đơn Dương uănh dơm đŏng rnôk saơ ndrôk dak toh bah rnăk he păm ta nê. Lôch rnôk chuh vaccine pŭn ntô tâm nar 31/7, lĕ rngôch 76 mblâm ndrôk dak toh mpơl ji ndŭl djroh da dê. Bol rnăk hŏ joi dak si đah prăk dŏng rvăt 20 rkeh prăk ăp nar yơn ndrôk nha mô hŏ bah ji ơm, 8 mblâm ndrôk geh khĭt. Wa Phượng an lah, ndrôk geh ji n’hanh khĭt lah tă bah chuh vaccine pŭn ntô jêng ân trok tâm roh huach.

“Mô hŏ gĭt lah hôm dah âk khĭt đŏng ôh, yor bah ntơm tât aƀaơ bar pe jât nar hôm ma ndrôk păm mbro kơt aơ ri kơt lah kâp gŭ khĭt dơm mô dơi kơl rêh đŏng ôh. Ăp nar gŭ uănh saơ ndrôk bĭch wăm, rnăk wâl hên dŭt ji uh nuih n’hâm ngăn mô gĭt mhâm blău ƀư. Aƀaơ nău mpŏng ŭch bah rnăk wâl lah ndrôk geh ji kơt aơ lah tă bah chuh vaccine, n’gâng kan ntop kơl tă bah ƀon lan đă đơn vị tơm chuh vaccine ân trok tâm khuch khat an ƀon lan”.

  Nsing tâm nău ji wăm, rek uănh năl nău ji, lôch jêh uănh năl mham n’hanh rblang rêng gen. Cục Thú y (Bộ Nông nông nghiệp n’hanh Phát triển nông thôn) ntơm uănh năl nkô̆ bôk năp nău ji ndŭl djroh ta ndrôk dak toh ta n’gor Lâm Đồng tă bah ntưp kaman Pestivirus tauri lôch chuh vaccine NAVET-LPVAC bah Công ty Navetco. Na nê̆, lôch jêh uănh năl saơ 24/24 dĭng vaccine dja geh ntưp đah Pestivirus da dê, aơ lah ntil kaman jêng ntưp nău ji ndŭl djroh ta ndrôk. Nkre, Cục Thú y năl lah, mô saơ ntưp du ntil kaman ƀư jêng nău ji tâm ăp ndơ sa n’hanh ndrui vi sinh dŏng an ndrôk dak toh đêt.

Aƀaơ, nô nău ndrôk ji ndŭl djroh n’hanh khĭt ta Lâm Đồng nha hôm tât krit nji đŏng, ăp nar roh huach tơm ndơ dŭt âk an nău  nchuăt joi trong săm. Yơn lah, kơt lah nuĭh ƀon lan nơm nha hôm joi êng prăk săm ji an ndrôk đŏng./.