“Uănh khlay tay, ntrôl dăng lơn đŏng pah kan nkoch trêng, nkơnh n’hơ cà phê kah khlay Việt Nam tât nuĭh dŏng tâm dak  n’hanh dak bah dih”. Aơ lah 1 tâm ăp nău dơn kan dơi Chi hội cà phê kah khlay lah rjăp tâm Nghị quyết Đại hội Chi hội cà phê kah khlay tâl 2, nău dơn kan 2024-2029 ƀư nar 2-8, ta nkual ƀon têh Buôn Ma Thuột, n’gor Dak Lak. Chi hội cà phê kah khlay (mpeh Hiệp hội Cà phê Buôn Ma Thuột, n’gor Dak Lak) dơi  njêng năm 2019.

 Lôch 5 năm têh jêng n’hanh hun hao, tât aƀaơ Chi hội hŏ geh rlău 80 hội viên ta ăp nkual tăm cà phê rgum  tơm  lam  dak ( lah: Dak Lak, Dak Nông, Lâm Đồng, Gia Lai, Kon Tum, Sơn La, Quảng Trị, Nghệ An... ). Ta Đại hội, ăp đại biểu hŏ rgop nău gay rdâk njêng chi hội hun hao lơn đŏng tâm năm kan tât, lah rjăp n’hao tay nău khlay kan buăt nthoi đah ăp nuĭh lăp kan nsum, ntung njŏ  wăch rgum ăp nuĭh wâr, tăch rgâl, rêng mpô̆ng tăch n’hanh ăp  đơn vị pă an rhŏ dŏng gay rdâk njêng ăp rêng tâm rgop kan nâp dăng. N’hao nău dơi ƀư njêng cà phê kah khlay, kơi năp nti, dŏng ăp nău dơi công nghệ mhe, ƀư njêng cà phê kah khlay nkre đah ăp rnoh tŏng ƀư njêng cà phê jŏ jong.