Aƀaơ, âk nuĭh ƀon lan kan lŏ mir ta nkuăl Duy Xuyên, n’gor Quảng Nam lĕ rgâl ntŭk ƀon tơm, ndrĭch lŏ jêng ntŭk uănh nsong pâl nđaih sinh thái n’hanh nta an nău kan an âk nuĭh kan ta ntŭk.

Jêh rnôk hăn nti ta Nhật Bản sĭt, yuh Trần Thị Ngọc Trang ta xă Duy Thành, nkuăl Duy Xuyên rgâl nkra nkual mir rnăk wâl, kuih ntu ka, tăm srah hồng, ƀư ntung rla mât ka, hun hao pâl nđaih sinh thái. Năch tât ta aơ dơi ƀư ngăn ndrĭch sen, wah duk tâm nglău. Bah meng ƀư an năch uănh nsong ndrĭch sen, yuh Trần Thị Ngọc Trang tăm tay âk ntil nkao êng, pă dăp si nkao tâm di gay năch dơi săch rnôk check-in. Yuh Trang an gĭt, yuh mô tăch vé lăp nkual pâl nđaih sinh thái ma pơk dah ŭch, tăch tăch ndơ sông sa n’hanh dak ngêt. Năch pâl nđih tât chŭp rup n’hanh ngêt sa ăp ndơ ngêt sa đah rnoh thuk.

“Năch tât ta aơ dơi ƀư ngăn geh nkual pâl bah dâng mir play đung n’hanh ăp nuĭh dơi wah duk hăn n’glău sen. Ntrong ƀư aơ nta an nău kan geh prăk an âk nuĭh ƀon lan geh prăk”.

Năm 2019, wa Lê Thị Thanh Nga manh 2 ha neh nsoih dơm êp lò gạch ơm ta ndrĭch xă Duy Vinh, nkuăl Duy Xuyên gay srih tăm ba chăng tĭng trong tăm hữu cơ. Jêh âk yan kăch rek săk geh âk, wa Nga pơk hvi tay rnoh neh srih tăm ba hao 5ha. Du năm, ntŭk an tuch tăm, pă an ntŭk tăch rlău 30 tấn phe chăng n’hanh du đêt ndơ bah phe kah aơ kơt: dak toh phe ônh, trà phe ôi. Ta aơ, du nar wăch rgum bơi 200 năch pâl nđaih tât uănh nsong, ƀư ngăn. Năch pâl nđaih tât ta aơ rwăt ndơ phe chăng, dơi ƀư ngăn tăm êng ba, tôch biăp n’hanh nkret gâm ndơ sa, sa ta ntŭk. Wa Lê Thị Thanh Nga an gĭt, rlău ma nău ŭch tuch tăm ba gay sŏk phe hữu cơ, aơ hôm lah ntŭk check-in n’hanh năch năch ƀư lŏ mir ngăn.

“Mpŏng m’hâm ƀư n’hao rnoh khlay ndơ lŏ mir ty nuĭh ƀon lan ƀư luh. Ƀư lŏ mir tâm rgop đah pâl nđaih lah mpông pơk an tăch n’gluh ndơ lŏ mir ta ntŭk. Ndơ aơ tăch n’gluh hăn ăp dak. Aơ lah ntrong ƀư dŭt săk rnglăy an pơk hvi an âk ƀon lan ndrel ƀư. Aƀaơ geh âk băl tât nti uănh nsong ntrong kan aơ”.

Ta nkuăl Duy Xuyên, n’gor Quảng Nam aƀaơ geh 25 rnăk ntuh kơl ƀư pâl nđaih lŏ mir, pâl nđaih sinh thái, rgop nta an nău kan an âk nuĭh, nsĭt tay nău geh âk an nuĭh ƀon lan. Wa Phan Xuân Cảnh, Kruanh UBND nkuăl Duy Xuyên, n’gor Quảng Nam an gĭt, nkuăl geh âk nău kơl ntop an nuĭh ƀon lan ƀư pâl nđaih, tiăr nti nău blău rhŏ an năch, ndơ̆ kônh wa hăn uănh nsong, nti ôp ta ăp ntŭk êng.

“Ăp ntŭk hăn ndrel nkra njêng lŏ mir đah hun hao ăp ntil trong ƀư pâl nđaih nkre n’hao nău khlay n’hanh n’hao nău dơh nsĭt tay an an nuĭh ƀon lan tă bah ăp nkual pâl nđaih sinh thái tâm ntŭk gŭ rêh. Ntĭt nsa ƀư cau Trà Đông, ntrong ƀư tăm tơm sa play, jêng ntŭk tât bah năch pâl nđaih tâm nău wăch rgum pâl nđaih hăn ndrel đah nkra njêng lŏ mir. Ăp Ntrong ƀư aơ ntơm geh ndơ mhe, rgop n’hao nău geh an kônh wa”.