Tâm bôk nău kan n’hao êng săk  ƀon lan kan lŏ mir Việt Nam 2024, ôi ntri (14/10) ta Hà Nội, Trung ương Hội Nông dân Việt Nam kan nsum đah Bộ Nông nghiệp n’hanh Phát triển nông thôn ƀư rgum nchră ƀon lan kan lŏ mir gưl neh dak tâl 9 năm 2024.

Đah nkô̆ “Djăt ƀon lan kan lŏ mir lah” Rgum nchră ƀon lan kan lŏ mir gưl neh dak tâl 9 năm 2024 ndrel nkoch, dăn đă mpeh ăp nkô̆ nău ma ƀon lan kan lŏ mir, hợp tác xã dŭt uănh khlay aƀaơ kơt: rdâk jêng tay nău kan tuch tăm lôch phŭt mbrô 3 lơh, lơn lah ntop kơl mpeh kon si ntil, ndơ dŏng kan tuch tăm bôk năp, trong ntop kơl bảo hiểm tuch tăm; njong rnon, ntoch rnon ngân hàng n’hanh an manh tơm  prăk mhe gay ƀon lan kan lŏ mir ngăch rdâk tay nău kan tuch tăm mât rong. Lah ta rnôk rgum nchră, Bộ trưởng Bộ Nông nghiệp n’hanh Phát triển nông thôn Lê Minh Hoan an gĭt, lah mâp jêr jŏt tâm rnôk tuch tăm mẩt rong, ƀon lan kan lŏ mir mbra nhắn tin an Bộ trưởng n’hanh Bộ trưởng mbra njuăl ơh tay ăp tin nhắn bah ƀon lan kan lŏ mir tât kruanh rđău kan ăp n’gor gay ngăch ntĭm nti, droh rklaih ăp jêr jŏt, kŏ kol./.