Dor yôk Si Pa Phìn, xã Si Pa Phìn, nkuâl Nậm Pồ, n’gor Điện Biên lah ntŭk ntrơn gŭ mhe ntĭt leo lor  tâm rơh ntrơn du rong ntŭk  an rdâk  njêng Nhih máy Thuỷ điện Sơn La. Ntơm bah blah neh kro ntang, nău rêh jêr jŏt, nuĭh ƀon lan joi tĭng mbâr sa, tât aƀaơ, nơm geh nău nsrôih lam trong kan chính trị n’hanh nuĭh ƀon l an ta ntŭk, dor yôk Si Pa Phìn hŏ rgâl jêng ntŭk  tăm biăp têh hvi, nău mpŏng n’hao  wăng sa, nău rêh bah nuĭh ƀon lan hun hao du trong nâp dăng.

Uănh bah yôk prêh, 18 dâng rđŭng tâm nđơn nsum tâm ban kơt ngan kŭp geh rnoh hvi rlău 30ha bah dor yôk Si Pa Phìn dơi nkrum nđĭr lam dâng sre. Ăp nkual dơi dăp rgum tĭng blah lŏ gay tăm bum, biăp tĭng khay đah ăp nkual jay jal, jay bil têh uĕh mhe.

Wa  Vàng A Kỷ, Bí thư Đảng ủy xã Si Pa Phìn an gĭt: lam  nkual dja  ntơm nơh lah neh tuch tăm dơi  tâm pă an nuĭh ƀon lan ntrơn du. Tâm rơh ntrơn du bôk  năp ntơm bah n’gul  năm 1992, nuĭh ƀon lan dơi ntop kơl rlong tăm tao, tăm bri yơn mô nsĭt geh âk tă bah tăm tao mô geh nhih máy nkret njêng,  mô geh nuĭh rvăt; tăm bri rnoh tơm rêh dŭt đêt tă bah kro phang.

Nău rêh bah rnoi Thái ta ăp ƀon lan ntŭk gŭ mhe kơt: Tân Lập, Tân Hưng, Chiềng Nưa, Tân Phong… yor kơt nê̆  mâp âk jêr jŏt rnôk nsing tâm neh lŏ n’hanh hăn kan thuê an bu tĭng khay  kăch  rek. Nău ji ngot, ach o ƀư âk rnăk druh ndăm ntlơi ƀon lan hăn nkual ƀon têh  joi sa, kon bê ntlơi tay an u che ranh, jay  ntĭl mpông rêk klêk, ƀon  ach  o ơm đêt nuĭh jêng lơn ma  rngơt rngăt lơn.

Ndrĭ ma aƀaơ, dor yôk Si Pa Phìn hŏ rgâl đah ăp mir biăp nđĭr tĭng khay. Nuĭh ƀon  lan hŏ gĭt tăm biăp, tăm tơm sa play kah khlay tâm jay bil, jal. Biăp, play bah Si Pa Phìn mô dơn n’gluh tăch an nkual ƀon têh Điện Biên Phủ ma hôm kơl tŏng an mbâr sa ăp nar bah bơi 15.000 kon se nti nội trú, bán trú bah nkuâl Nậm Pồ n’hanh du gâl an kon se nti ăp xã bah nkuâl Mường Chà. Wa Vàng A Kỷ, Bí thư Đảng ủy xã Si Pa Phìn lah:

Tĭng kơn kônh wa ƀon lan hŏ gĭt dŏng khoa học kỹ thuật tâm nău kan tuch tăm n’hanh hăn tât mbra ndơ̆ rgâl công nghệ an ƀon lan ta ăp nkual tŏng geh mpeh neh ntu n’hanh dak gay pơk hvi tay neh. Ntơm bah nê kơl nău rêh kônh wa  ƀon lan tĭng kơn rgâl geh hun hao wăng sa, nsan hao ƀư geh ndrŏng.

Wa Ngô Xuân Chiến, Kruanh Jrô kan ntĭm nti nkuâl Nậm Pồ, nuĭh hŏ  ntơm njêng mir tăm biăp ta dor yôk Si Pa Phìn nkoch: Rnôk Huyện ủy Nậm Pồ n’gluh an dŏng Nghị quyết 56 mpeh hun hao nkual tăm bum, biăp, play đăp mpăn, lvang năm 2023-2025, nău lor bôk  năp dơi mĭn tât lah rlay kah săk  geh tuch tăm bah dor yôk Si Pa Phìn n’hanh đăp mpăn mbâr sa an kon se nkual n’har bri. Nău mĭn dja hŏ dơi ƀon lan,  ăp kruanh xã dôl kan, kruanh ơm bah xã ndrel ăp kruanh ƀon ta Si Pa Phìn du nuih n’hâm  tâm ban ŭch âk.

Nơm geh nău kơl bah nuĭh ƀon lan, nău lĕ nuih n’hâm,  nău dơn kan bah mpôl kruanh mât bôk kan xã Si Pa Phìn, rnoh neh tâm ntêng lêng đah rnoh hvi rlău 30ha ta dor yôk dja hŏ jêng săk. Gay geh dak tŏ an lĕ rngôch mir tăm biăp tâm khay wai, nuĭh ƀon lan, n’gâng kan ta ntŭk hŏ kuĭh âk ntu n’gâr dak, n’hoch dak bah ăp tu dak me Nậm Chim sĭt rgum. Rlău ăp nău jêr jŏt, ntơm bah khay 01/2024, mir hŏ pă an ăp tŏng rnoh biăp an mbâr sa ăp nar bah rlău 15.000 kon se nti bah nkuâl  n’hanh n’gluh tăch nkual ƀon têh Điện Biên Phủ.

Jrô kan ntĭm nti dơi nkuâl jao nău  dơn kan  lah nhih pah kan bôk tơm gay groi nđôi lĕ rngôch rêng tuch tăm tâm ban kơt ăp kỹ thuật tuch tăm gay đăp mpăn mhâm ƀư lĕ rngôch rnoh biăp tăm ta nkual rnôk ndơ̆ tât gâm sa dơi đăp mpăn kloh uĕh an kon se nti da dê.

Bah mir biăp Si Pa Phìn, âk rnăk hŏ dơi nti tay nău blău  tăm  tơm, tăm biăp săk  jêng âk tĭng rêng kan tuch tăm kloh uĕh,  mô dŏng dak si khêh djơh. Nău dŭt khlay lah mbrơi rgâl trong mĭn, trong kan.

Yuh Lò Thị Phương, nuĭh ƀon lan Tân Lập an gĭt: ăp khay yuh dơn geh prăk khay bơi 7 rkeh prăk, đăp  mpăn nkơng an nău rêh n’hanh ăp  kon hăn nti ren. Mô dơn yuh Phương ma âk nuĭh hŏ  ntlơi nău mĭn hăn kan thuê an bu plơ̆ sĭt hun hao wăng sa ta me neh he nơm.  Aƀaơ rĭng ăp nar geh bơi 20 nuĭh kan  lah nuĭh rnoi mpôl đê̆  pah kan ta mir, rnôk dŭt âk nuĭh rôk bum biăp hao tât 50 nuĭh kan. 

Nơm geh ăp cán bộ xã njêng mir biăp, nău  kan đăp mpăn an nuĭh ƀon lan ma mpôl hên geh nău rêh uĕh, oh kon hăn nti mô hôm rvê âk mpeh prăk kaih. Mir biăp dŭt kloh uĕh jêng ta jay mô kâp  tăm  ma sŏk biăp ta mir sĭt sa dĭl.

Dor yôk Si Pa Phìn aƀaơ nsoh ta săk he ao mhe đah tơm biăp nđĭr wăr năm. Bah mir biăp dja, nđơr klaih rlău ach o bah nuĭh ƀon  lan tâm xã nsan hao đah nău nchrăp rgâl uĕh jêng neh lŏ, neh bri, pơk hvi neh tăm biăp,  tăm bum  gay rgop suan ndrel n’gâng kan ta ntŭk nsrôih ƀư lôch jêh tât kêng dŭt năm 2024 hŭch rnoh rnăk ach o lam xã jŭr hôm 32%, rgâl an rnoh rlău 40% hŏ gŭ âk năm aơ ta  nkual  neh jêr jŏt dja.